सोलापूर सहकार क्षेत्रातील विश्वासार्ह वाटचाल कायम ठेवत मनोरमा को-ऑपरेटिव्ह बँकेने विस्ताराची आणखी एक पायरी गाठली असून, सोलापुरातील अंत्रोळीकर नगर येथे बँकेच्या ११व्या शाखेचा भव्य शुभारंभ रविवारी (दि. २६ जुलै) सकाळी ११.३० वाजता हॉटेल बालाजी सरोवर, हॉटगी रोड येथे होणार आहे. याच कार्यक्रमात कै. सदाशिवराव रामचंद्र मोरे आदर्श शिक्षक पुरस्काराने सहा शिक्षकांचा गौरव करण्यात येणार आहे.
ही माहिती मनोरमा को-ऑपरेटिव्ह बँकेचे अध्यक्ष श्रीकांत मोरे यांनी कोटणीस नगर शाखेत आयोजित पत्रकार परिषदेत दिली. यावेळी शोभा मोरे, डॉ. रिचा पाटील, सी. यू. कुलकर्णी, चंद्रकांत खरटमल आणि मैनुद्दीन नदाफ उपस्थित होते. ९ मे १९९७ रोजी संस्थापक अध्यक्ष कै. सदाशिवराव मोरे यांनी स्थापन केलेल्या मनोरमा बँकेने सातत्यपूर्ण प्रगतीची परंपरा कायम राखली आहे. ३१ मार्च २०२६ अखेर बँकेचा एकूण मिश्र व्यवसाय ₹१०६.६७ कोटींवर पोहोचला असून, सलग आठ वर्षे बँकेचा एनपीए शून्य टक्के राखण्यात यश आल्याची माहितीही श्रीकांत मोरे यांनी दिली.
उद्घाटन सोहळ्याच्या अध्यक्षस्थानी श्रीकांत मोरे असतील. कॉसमॉस बँकेचे अध्यक्ष संजीव खडके, पीपल्स को-ऑपरेटिव्ह बँकेचे अध्यक्ष श्रीधर गायकवाड, आमदार सुभाष देशमुख, आमदार देवेंद्र कोठे, माजी आमदार दिलीप माने, जिल्हा उपनिबंधक मुकुंद पवार, उपनिबंधक उमेश पवार आणि जिल्हा विशेष लेखापरीक्षक व्ही. व्ही. डोके हे प्रमुख पाहुणे म्हणून उपस्थित राहणार आहेत. शाखा विस्तारासोबतच शिक्षण क्षेत्रातील उल्लेखनीय योगदानाची दखल घेत कै. सदाशिवराव रामचंद्र मोरे आदर्श शिक्षक पुरस्काराने जिल्हा परिषदेसह विविध क्षेत्रातील सहा शिक्षकांचा सन्मान करण्यात येणार असल्याने या सोहळ्याला विशेष महत्त्व प्राप्त झाले आहे.
