सपकाळांविरोधात राष्ट्रवादीचा ; काँग्रेस भवनासमोर आंदोलन

सोलापूर : काँग्रेस प्रदेशाध्यक्ष हर्षवर्धन सपकाळ यांनी उपमुख्यमंत्री सुनेत्रा पवार यांच्याबाबत केलेल्या वादग्रस्त वक्तव्याचे पडसाद सोलापुरात उमटले. राष्ट्रवादी काँग्रेस पार्टी (अजित पवार गट)च्या वतीने बुधवारी काँग्रेस भवनासमोर जोरदार निदर्शने करत सपकाळ यांनी तातडीने जाहीर माफी मागावी, अशी मागणी करण्यात आली. घोषणाबाजी आणि प्रतीकात्मक निषेधामुळे परिसर काही काळ दणाणून गेला. आंदोलनात राष्ट्रवादी काँग्रेसच्या पदाधिकाऱ्यांनी सपकाळ यांच्या वक्तव्याचा तीव्र निषेध नोंदवत ते महिलांचा आणि राजकीय संस्कृतीचा अवमान करणारे असल्याचा आरोप केला. कार्यकर्त्यांनी हातात फलक घेत घोषणाबाजी केली आणि सपकाळ यांच्याविरोधात संताप व्यक्त केला.

यावेळी पक्षाचे ज्येष्ठ नेते तौफिक शेख पैलवान म्हणाले, “उपमुख्यमंत्री सुनेत्रा पवार यांच्याबाबत करण्यात आलेले वक्तव्य अत्यंत निषेधार्ह आहे. हर्षवर्धन सपकाळ यांनी राज्यातील जनतेची तसेच सुनेत्रा पवार यांची जाहीर माफी मागावी.” ते पुढे म्हणाले की, “सुनेत्रा पवार या शांत, संयमी आणि कार्यकर्त्यांच्या अडचणी सोडविणाऱ्या नेत्या आहेत. मंत्री, खासदार, आमदार, पदाधिकारी आणि सर्वसामान्य कार्यकर्त्यांना न्याय देण्याचे काम त्यांनी केले आहे. महिलांविषयी अशा प्रकारची आक्षेपार्ह भाषा वापरणे कोणत्याही सुसंस्कृत राजकीय परंपरेला शोभणारे नाही.”

या आंदोलनात उत्तर सोलापूर तालुकाध्यक्ष सुवर्णा झाडे, अल्पसंख्याक जिल्हाध्यक्ष रियाज शेख, जिल्हा उपाध्यक्ष नागेश पवार, आसिफ राजे, अकिल नाईकवाडी, आबीद सय्यद, अन्वर शेख, सौदागर बाबर, जितेंद्र शिलवंत, सैफू मणियार, अरफात सय्यद, जुनेद दर्जी, दिलीप ननवरे, उत्तर सोलापूर युवक अध्यक्ष नंदकुमार गरड, प्रवीण करंडे, बशीर शेख, हेमंत चौधरी, बंडू मस्के, सुनील चव्हाण यांच्यासह मोठ्या संख्येने पदाधिकारी व कार्यकर्ते सहभागी झाले.

घोषणाबाजीने काँग्रेस भवन परिसर दणाणला
आंदोलनादरम्यान कार्यकर्त्यांनी हर्षवर्धन सपकाळ यांच्या छायाचित्राला बांगड्यांचा हार घालून प्रतीकात्मक निषेध व्यक्त केला. “माफी मागा… माफी मागा… हर्षवर्धन सपकाळ माफी मागा,” “हर्षवर्धन सपकाळचे करायचं काय… खाली मुंडकं वर पाय,” तसेच “सुनेत्रा ताई तुम आगे बढो, हम तुम्हारे साथ हैं” अशा जोरदार घोषणांनी काँग्रेस भवन परिसर दणाणून गेला. पोलिस बंदोबस्तात हे आंदोलन शांततेत पार पडले असून, सपकाळ यांनी माफी मागितली नाही तर आंदोलन अधिक तीव्र करण्याचा इशाराही आंदोलनकर्त्यांनी दिला