जिल्हा बँकेसाठी जयकुमार गोरे’ यांचे बंधु शेखर गोरे पुन्हा मैदानात!

सोलापूर : सातारा जिल्हा मध्यवर्ती सहकारी बँकेच्या आगामी निवडणुकीने राजकीय वातावरण तापण्यास सुरुवात झाली असून, विद्यमान संचालक शेखर गोरे यांनी पुन्हा एकदा निवडणुकीच्या मैदानात उतरण्याची घोषणा केली आहे. माण सोसायटी मतदारसंघातून गेल्या निवडणुकीत मोठ्या राजकीय संघर्षानंतर विजयी झालेल्या गोरे यांनी यावेळीही पूर्ण ताकदीने निवडणूक लढविण्याचा निर्धार व्यक्त केला.

विधान परिषद निवडणुकीत भाजपकडून उमेदवारी मिळण्याची अपेक्षा असतानाही तिकीट न मिळाल्याने चर्चेत आलेले शेखर गोरे आता जिल्हा बँकेच्या निवडणुकीच्या माध्यमातून पुन्हा राजकीय ताकद दाखविण्याच्या तयारीत आहेत. ‘आपण निवडणुकीत उतरलो की यश मिळवून दाखवतो, हा आजपर्यंतचा इतिहास आहे,’ असा दावा त्यांनी केला. गेल्या पंचवार्षिक निवडणुकीत माण सोसायटी मतदारसंघातून निवडणूक लढवत गोरे यांनी जिल्हा बँकेत संचालकपद मिळविले होते. आगामी निवडणुकीसाठी अनेक इच्छुकांनी आतापासूनच मोर्चेबांधणी सुरू केली असली तरी जिल्हा बँकेत यंदाही आपणच संचालक म्हणून जाणार, असा ठाम विश्वास गोरे यांनी व्यक्त केला.

दरम्यान, गोरे यांच्या या घोषणेमुळे माण सोसायटी मतदारसंघातील राजकीय समीकरणांना पुन्हा एकदा वेग येण्याची शक्यता असून, आगामी निवडणुकीत त्यांच्यासमोर कोण आव्हान उभे करणार, याकडे राजकीय वर्तुळाचे लक्ष लागले आहे.