सोलापूर : बेकायदेशीरपणे गावठी पिस्तूल व जिवंत काडतुसे जवळ बाळगणाऱ्या एका इसमास विजापूर नाका पोलिसांनी अटक केली. त्याच्याकडून देशी बनावटीचे एक गावठी पिस्तूल, पाच जिवंत काडतुसे, दोन मोबाईल व मोटारसायकल असा एकूण १ लाख ३६ हजार रुपयांचा मुद्देमाल जप्त करण्यात आला आहे.
विजापूर नाका पोलिस ठाण्याचे गुन्हे प्रकटीकरण पथक प्रमुख शितलकुमार गायकवाड व पथकातील पोलिस अंमलदार कर्तव्यावर असताना, गुप्त बातमीदारामार्फत माहिती मिळाली की, विजयपूर ते सोलापूर मार्गावर स्प्लेंडर प्लस मोटारसायकल क्रमांक KA28HF2336 वर एक इसम अंगावर रेंगाचे टी-शर्ट व जीन्स पॅन्ट घालून गावठी पिस्तूल व जिवंत काडतुसे घेऊन फिरत आहे.मिळालेल्या माहितीची खात्री करून पोलिस पथकाने पंचांसह संबंधित ठिकाणी कारवाई केली. दि. १९ ऑगस्ट २०२६ रोजी पहाटे सुमारे २.२६ वाजता संशयित इसमास ताब्यात घेण्यात आले.
आरोपी मंजुनाथ शांतप्पा निरणशेट्टी (वय ३१, व्यवसाय-खाजगी नोकरी, रा. मुळपो. शांतेंश्वर गल्ली, इंडी ग्रामीण, ता. इंडी, जि. विजयपूर, कर्नाटक) असे आहे.त्याची अंगझडती घेतली असता त्याच्या ताब्यातून एक देशी बनावटीचे लोखंडी बॉडी असलेले गावठी पिस्तूल, पाच जिवंत काडतुसे, दोन मोबाईल व मोटारसायकल असा १ लाख ३६ हजार रुपये किमतीचा मुद्देमाल मिळून आला. पिस्तूल बाळगण्याबाबत परवाना आहे का, अशी विचारणा केली असता त्याच्याकडे कोणताही परवाना नसल्याचे निष्पन्न झाले.
याप्रकरणी विजापूर नाका पोलिस ठाण्यात गु.र.नं. ४५५/२०२६, भारतीय हत्यार कायदा कलम ३(२५) अन्वये गुन्हा दाखल करण्यात आला असून, आरोपीस दि. १९ ऑगस्ट रोजी सकाळी ५.२० वाजता अटक करण्यात आली आहे.पोलिस कोठडीत आरोपी मंजुनाथ निरणशेट्टी याच्याकडे गावठी पिस्तूल व काडतुसे कोठून आणली याबाबत चौकशी केली असता, त्याने हे पिस्तूल व काडतुसे इंडी येथील त्याचा मित्र धनश्याम दल्लीचंद जाट याच्याकडून घेतल्याचे सांगितले. त्यानुसार पोलिसांनी तपासाची दिशा निश्चित केली असून, संबंधित व्यक्तीचा शोध घेऊन पुढील कारवाई सुरू आहे.ही कारवाई पोलीस आयुक्त एम. राजकुमार, पोलीस उपायुक्त (परिमंडळ) विजयलक्ष्मी कुर्मी, वरिष्ठ पोलीस निरीक्षक त्रिमत यावलकर यांच्या मार्गदर्शनाखाली करण्यात आली. कारवाईत वरिष्ठ पोलीस निरीक्षक शितलकुमार गायकवाड, गुन्हे प्रकटीकरण पथकाचे अधिकारी व अंमलदार सहभागी झाले.
