सोलापूर ; विधान परिषद निवडणुकीच्या मतमोजणीला सोमवारी (ता. २२) सकाळी ८ वाजल्यापासून सुरू होईल. केवळ ६१४ मतांची मोजणी असल्याने अवघ्या २ तासांतच त्याची प्रक्रिया संपेल. त्यासाठी महसूल व पोलिस प्रशासनाची टीम सज्ज झाली आहे. नियोजन भवनात ही मतमोजणी होणार असल्याने तेथे मंडप टाकण्याचे काम शुक्रवारी दिवसभर सुरू होते. विधानसभेचे ११ मतदार आहेत. आता विधान परिषदेत निवडून जाणारा जिल्ह्याचा बारावा आमदार असेल. संपूर्ण मतमोजणी दोन फेऱ्यांमध्ये होणार आहे. एकूण ४ टेबलची व्यवस्था करण्यात आली. सुरुवातीला सर्व मतपेट्यांमधून मते बाहेर काढली जातील. त्यानंतर मोजणी करून वैध आणि अवैध मते वेगळी करण्याचे काम पहिल्या फेरीत पूर्ण होईल. दुसऱ्या फेरीत प्रत्यक्ष मतमोजणीला सुरुवात होईल. पहिल्या फेरीत वेगळी केलेली वैध मते या चारही टेबलवर मोजणीसाठी दिली जातील.
दोन तासांत प्रक्रिया पूर्ण होईल
मतमोजणीवर देखरेख ठेवण्यासाठी दोन प्रांत अधिकाऱ्यांची नियुक्ती झाली. चारही टेबलवर मतमोजणीचे मुख्य काम चार तहसीलदार करणार आहेत. प्रत्येक टेबलवर तहसीलदारांना मतमोजणीत मदत करण्यासाठी प्रत्येकी तीन सहाय्यक कर्मचाऱ्यांची नियुक्ती करण्यात आली आहे. दोन फेऱ्यांमध्ये दोन तासातच मतमोजणीची प्रक्रिया पूर्ण होईल.”
अभिजित पाटील, निवासी उपजिल्हाधिकारी
