नियम व शिस्त पाळण्याची ग्वाही; संचालक मंडळाच्या बैठकीत निर्णयाचा दिलासा
सोलापूर, : श्री सिद्धेश्वर कृषी उत्पन्न बाजार समितीच्या आवारात रिक्षा व्यवसायाला परवानगी मिळावी, या मागणीसाठी रिक्षाचालकांनी आक्रमक पण संयमी भूमिका घेतली आहे. बाजार समितीचे सर्व नियम, निकष आणि शिस्त पाळण्यास आम्ही कटिबद्ध आहोत; मात्र आमचा उदरनिर्वाह याच व्यवसायावर अवलंबून असल्याने आम्हाला आवारात प्रवेश द्यावा, अशी मागणी रिक्षाचालकांनी बाजार समितीचे सभापती दिलीपराव माने यांच्याकडे केली. सभापती दिलीपराव माने यांनी शुक्रवारी पहाटे पाच वाजता बाजार समितीच्या विविध विभागांची पाहणी केली. यावेळी गेट परिसरात रिक्षाचालकांनी त्यांची भेट घेऊन आपल्या अडचणी मांडल्या. रिक्षाचालकांच्या मागणीवर प्रतिक्रिया देताना माने म्हणाले की, काही चालकांकडून होणारी अरेरावी तसेच वाहतुकीला होणारा अडथळा यामुळे प्रशासनाला यापूर्वी कठोर पावले उचलावी लागली होती. मात्र रिक्षाचालकांच्या मागणीचा सहानुभूतीपूर्वक विचार करून संचालक मंडळाच्या बैठकीत याबाबत योग्य तो निर्णय घेतला जाईल.
या पाहणीदरम्यान सभापतींनी कांदा, भाजीपाला, फळ व फुल बाजाराचीही पाहणी केली. यावेळी त्यांनी व्यापारी आणि शेतकऱ्यांशी संवाद साधून बाजारातील अडचणी जाणून घेतल्या. विशेषतः कोकणातून आंबा विक्रीसाठी आलेल्या उत्पादकांशी त्यांनी चर्चा केली. शेतकऱ्यांच्या मालाचे वजन, व्यवहार किंवा देयक प्रक्रियेत कोणतीही फसवणूक खपवून घेतली जाणार नाही. बाजार समिती प्रशासन पूर्णपणे शेतकऱ्यांच्या पाठीशी उभे आहे, असे स्पष्ट निर्देशही सभापती माने यांनी संबंधित अधिकाऱ्यांना दिले. बाजार समिती परिसरातील वाहतूक, शिस्त आणि शेतकरी हित या तिन्ही बाबींचा समतोल राखत निर्णय घेण्यात येईल, असेही त्यांनी स्पष्ट केले.
