सोलापूर : उच्च न्यायालयातील कर्मचाऱ्यांप्रमाणे दुय्यम न्यायालयीन कर्मचाऱ्यांनाही सुधारित वेतनश्रेणी लागू करावी, या प्रमुख मागणीसाठी सोलापूर जिल्हा न्यायालयाच्या अधिपत्याखालील सोलापूर शहर व तालुका न्यायालयांतील कर्मचाऱ्यांनी बुधवारी (१६ सप्टेंबर) काळ्या फिती लावून दैनंदिन कामकाज केले. शासनाने सुधारित वेतनश्रेणीच्या प्रस्तावावर अद्याप ठोस निर्णय घेतला नसल्याने न्यायालयीन कर्मचाऱ्यांमध्ये नाराजी व्यक्त होत आहे.
राज्यातील दुय्यम न्यायालयीन कर्मचाऱ्यांच्या विविध मागण्यांसाठी चारही न्यायालयीन कर्मचारी महासंघांनी आंदोलनाची घोषणा केली आहे. आंदोलनाच्या पहिल्या टप्प्यात बुधवारी कर्मचाऱ्यांनी काळ्या फिती लावून कामकाज करत शासनाचे लक्ष वेधले. यानंतर आंदोलन अधिक तीव्र करण्याचा इशारा देण्यात आला आहे. ५ नोव्हेंबर रोजी सामूहिक रजा, तर ६ व ७ नोव्हेंबर रोजी अन्नत्याग आंदोलन करण्यात येणार आहे. या आंदोलनानंतरही शासनाने मागणीचा सहानुभूतीपूर्वक विचार करून ठोस निर्णय घेतला नाही, तर १७ नोव्हेंबरपासून बेमुदत संप पुकारण्यात येईल, असा इशारा कर्मचारी संघटनांनी दिला आहे.
या आंदोलनात तृतीय श्रेणी कर्मचारी संघटनेचे जिल्हाध्यक्ष शाम राजेपांढरे, लघुलेखक संघटनेचे अध्यक्ष शकिल शेख, बेलिफ संघटनेचे अध्यक्ष गणेश सोलनकर, चतुर्थ श्रेणी संघटनेचे अध्यक्ष सुकृत कुलकर्णी, प्रबंधक संजय म्याकलवार यांच्यासह शहर व तालुका न्यायालयांतील कर्मचारी मोठ्या संख्येने सहभागी झाले होते. सुधारित वेतनश्रेणीचा प्रश्न शासनाने तातडीने मार्गी लावावा, अशी मागणी यावेळी कर्मचारी संघटनांकडून करण्यात आली.
