सोलापूर ; विजापूर रोडवरील महात्मा बसवेश्वर औद्योगिक प्रशिक्षण संस्थेच्या परिसरातील पाच एकर जागेत बसवसृष्टी साकारण्याची मागणी करीत तसे निवेदन विजापूर रोड मध्यवर्ती उत्सव महामंडळाच्या वतीने प्राचार्य मनोज बिडकर यांना मंगळवारी देण्यात आले.बाराव्या शतकात महात्मा बसवेश्वरांनी समतेचा संदेश दिला. मानवता हा धर्म अन् स्त्री-पुरुष या दोन जाती हे स्पष्टपणे सांगितले. आजच्या नव्या पिढीला बसवण्णांचे कार्य कळावे, त्यांच्या समतेचा प्रचार अन् प्रसार झाला तर शांतता नांदेल. यासाठी बसवसृष्टी साकारण्याची गरज महापालिकेच्या परिवहन विभागाचे माजी सभापती विजयकुमार हत्तुरे यांनी निवेदनात म्हटले आहे.
यावेळी विजापूर रोड मध्यवर्ती महात्मा बसवेश्वर महामंडळाचे ट्रस्टी रमेश हसापुरे, सकलेश बाबुळगावकर, बसवराज दिंडोरे, नामदेव फुलारी, चनबसप्पा गुरुभट्टी, आदी उपस्थित होते. राज्याचे मुख्यमंत्री देवेंद्र फडणवीस, मंत्री मंगलप्रभात लोढा, पालकमंत्री जयकुमार गोरे व दक्षिण सोलापूरचे आमदार सुभाष देशमुख यांच्याकडे ईमेलद्वारे निवेदन पाठवून देण्यात आले आहे.
या बसवसृष्टीमध्ये महात्मा बसवेश्वरांची अश्वारूढ मूर्ती, कायक शरणांची माहिती, विद्यार्थ्यांसाठी मोठे अद्ययावत वाचनालय, आधुनिक सभागृह अन् अनुभव मंडपाची प्रतिकृती असावी, असेही हत्तुरे यांनी निवेदनात म्हटले आहे. आयटीआयची २८ एकर जागा असून, या संस्थेत २७ व्यवसाय प्रशिक्षण कोर्स चालतात. २८ पैकी काही एकर जागा मिळावी, अशी बसवप्रेमींची मागणी आहे.
