सहकार क्षेत्रातील ज्येष्ठ नेत्याची काळाच्या पडद्याआड; देहदानाचा कुटुंबीयांचा निर्णय
सोलापूर : सोलापूरचे माजी खासदार तथा सहकार क्षेत्रातील ज्येष्ठ नेते विणकररत्न गंगाधरपंत सिद्रामप्पा कुचन (वय ९१) यांचे मंगळवारी पहाटे पाच वाजता अश्विनी रुग्णालयात हृदयविकाराच्या झटक्याने निधन झाले. त्यांच्या निधनाने सोलापूरच्या राजकीय, सहकारी आणि सामाजिक क्षेत्रात हळहळ व्यक्त होत आहे. गंगाधरपंत कुचन यांचे पार्थिव अंत्यदर्शनासाठी पद्मानगर येथील त्यांच्या निवासस्थानी ठेवण्यात आले असून मंगळवारी सायंकाळी ५ वाजता अश्विनी सहकारी रुग्णालयास देहदान करण्याचा निर्णय त्यांच्या कुटुंबीयांनी घेतला आहे.
सोलापूरसह महाराष्ट्रातील सहकारी क्षेत्रात उल्लेखनीय कार्य करणाऱ्या गंगाधरपंत कुचन यांनी राज्यातील सुमारे २३ सहकारी सूतगिरण्यांच्या उभारणीत मोलाचे योगदान दिले. १९८० आणि १९८५ च्या लोकसभा निवडणुकांमध्ये ते काँग्रेस पक्षाकडून सोलापूर लोकसभा मतदारसंघातून खासदार म्हणून निवडून आले होते. यशवंतराव चव्हाण आणि वसंतदादा पाटील यांचे ते निकटवर्तीय मानले जात होते. १९९० मध्ये काँग्रेसकडून उमेदवारी न मिळाल्यानंतर त्यांनी १९९१ मध्ये भारतीय जनता पक्षात प्रवेश केला. त्यानंतर काही काळाने पुन्हा काँग्रेसमध्ये प्रवेश करत त्यांनी विविध क्षेत्रात सक्रिय भूमिका बजावली. सोलापूर शहर व जिल्ह्यातील विविध पक्षांतील राजकारणी, सहकारी संस्था आणि सामाजिक क्षेत्रातील व्यक्ती त्यांच्याकडून मार्गदर्शन घेत असत.
अश्विनी सहकारी रुग्णालय, मार्कंडेय सहकारी रुग्णालय, नागरी बँका, पतसंस्था, सूतगिरण्या तसेच विडी घरकुल उभारणीमध्ये त्यांचा सिंहाचा वाटा होता. पूर्व भागातील अनेक शिक्षण संस्थांच्या उभारणीत, विशेषतः पद्मशाली शिक्षण संस्थेमध्ये त्यांचा सक्रिय सहभाग होता. गेल्या पंधरा वर्षांपासून सक्रिय राजकारणापासून दूर असले तरी वृत्तपत्र वाचन, विविध क्षेत्रातील घडामोडींचा अभ्यास आणि सहकार संस्थांना मार्गदर्शन करणे हे कार्य ते सातत्याने करत होते. गेल्या काही दिवसांपासून प्रकृती खालावल्याने त्यांच्यावर अश्विनी रुग्णालयात उपचार सुरू होते.
त्यांच्या पश्चात तीन विवाहित मुले, दोन विवाहित मुली, सुना, नातवंडे आणि जावई असा परिवार आहे.
