सोलापूर,- दक्षिण सोलापूर तालुक्यातील धोत्री येथील गोकूळ शुगरकडे प्रलंबित असलेल्या ऊस बिलाच्या रकमा येत्या सोमवारी संबंधित शेतकऱ्यांच्या बँक खात्यात जमा होतील, असे आश्वासन आमदार सचिन कल्याणशेट्टी यांनी दिल्यानंतर गेल्या अठरा दिवसांपासून जिल्हाधिकारी कार्यालयासमोर सुरू असलेले ऊस उत्पादक शेतकऱ्यांचे आंदोलन तात्पुरते स्थगित करण्यात येत असल्याची घोषणा गोकूळ शुगर आंदोलन संघर्ष समितीचे नेते अॅड. अमोल पाटील यांनी केली. तसेच आश्वासनाची पूर्तता न झाल्यास बुधवारपासून पुन्हा तीव्र आंदोलन छेडण्याचा इशाराही पाटील यांनी यावेळी दिला.
गोकूळ शुगरला ऊस गाळपासाठी पाठविलेले सोलापूर आणि धाराशिव जिल्ह्यातील शेतकरी जिल्हाधिकारी कार्यालयासमोर आंदोलन करत होते. या आंदोलनादरम्यान शेतकऱ्यांनी अर्धनग्न व जलसमाधी आंदोलन करून प्रशासन आणि कारखाना व्यवस्थापनाचे लक्ष वेधण्याचा प्रयत्न केला होता. गोकूळ शुगरकडे शेतकऱ्यांची सुमारे १३० कोटी रुपयांची ऊस बिलाची थकबाकी प्रलंबित असल्याचे सांगण्यात येते. ही रक्कम तत्काळ मिळावी, या मागणीसाठी शेतकरी आक्रमक झाले होते.
आंदोलनाची तीव्रता लक्षात घेऊन वरिष्ठ पातळीवरून हालचाली झाल्या. गुरूवारी दुपारी जिल्हाधिकारी कार्यालयात महत्त्वपूर्ण बैठक झाली. या बैठकीस आमदार कल्याणशेट्टी यांच्यासह जिल्हाधिकारी एस. कार्तिकेयन, प्रांताधिकारी सुमित शिंदे, तहसीलदार किरण जमदाडे, बाळासाहेब मोरे, तसेच आंदोलनाचे नेतृत्व करणारे अॅड. पाटील, अरविंद घोडके आणि इतर शेतकरी प्रतिनिधी उपस्थित होते. बैठकीत थकीत रक्कम सोमवारी शेतकऱ्यांच्या बँक खात्यात जमा करण्याबाबत सकारात्मक निर्णय घेण्यात आला. प्रशासनाशी झालेल्या चर्चेनंतर आमदार कल्याणशेट्टी यांनी आंदोलनस्थळी येऊन प्रशासनाबरोबर झालेल्या चर्चेची व निर्णयाची माहिती शेतकऱ्यांना दिली
