रविवार पेटीत टॉवेल कारखान्याला भीषण आग ; अग्निशमन दलाच्या तीन गाड्यांनी आगीवर नियंत्रण

सोलापूर : सोलापूर शहरातील रविवार पेठ परिसरातील बेडगिरी यांच्या टॉवेल कारखान्याला रविवारी दुपारी अचानक भीषण आग लागून टॉवेलचे गट्टे, शिलाई मशीन व इतर साहित्य जळून खाक झाले. या आगीत अंदाजे सहा ते सात लाख रुपयांचे नुकसान झाल्याचा प्राथमिक अंदाज व्यक्त करण्यात आला आहे.रविवार असल्याने कारखान्याला सुट्टी होती आणि कामगार उपस्थित नव्हते. त्यामुळे कोणतीही जीवितहानी झाली नाही. अन्यथा मोठा अनर्थ घडला असता.

मिळालेल्या माहितीनुसार, परिसरात वीजेचा लपंडाव सुरू होता. वीज कमी-जास्त होत असताना अचानक विद्युतभार वाढल्याने शॉर्टसर्किट होऊन आग लागल्याचा प्राथमिक अंदाज कारखान्याचे मालक महेश बेडगिरी यांनी व्यक्त केला.आगीची माहिती मिळताच घटनास्थळी महापालिकेच्या अग्निशमन दलाच्या रविवार पेठ, एमआयडीसी आणि भवानी पेठ येथील अग्निशमन बंब तातडीने दाखल झाले.

अग्निशमन दलाच्या जवानांनी सुमारे अर्धा तास अथक प्रयत्न करत तीन बंबांच्या साहाय्याने पाण्याचा मारा करून आगीवर नियंत्रण मिळविले.आगीमुळे परिसरात मोठ्या प्रमाणात धुराचे लोट पसरल्याने नागरिकांमध्ये घबराट निर्माण झाली होती. घटनास्थळी बघ्यांचीही मोठी गर्दी झाली होती.या दुर्घटनेत टॉवेलचे गट्टे, शिलाई मशीन व इतर साहित्य पूर्णपणे जळून खाक झाले असून सुमारे सहा ते सात लाख रुपयांचे आर्थिक नुकसान झाल्याचे कारखान्याचे मालक महेश बेडगिरी यांनी दिली घटनेची नोंद करण्यात आली असून आगीच्या नेमक्या कारणाचा अधिक तपास सुरू आहे.