सोलापूर : सोलापूर शहरातील गजबजलेल्या एसटी स्टँड परिसरात एका ६३ वर्षीय व्यक्तीची हत्या झाल्याची धक्कादायक घटना उघडकीस आल्याने खळबळ उडाली आहे. या प्रकरणी फौजदार चावडी पोलीस ठाण्यात अज्ञात आरोपीविरुद्ध खुनाचा गुन्हा दाखल करण्यात आला असून पोलिसांकडून आरोपीचा शोध सुरू आहे.पोलिसांनी दिलेल्या माहितीनुसार, तमिळनाडू राज्यातील कोयंबतूर येथील रहिवासी कृष्णप्रसाद व्ही. (वय ६३) हे सोलापूर एसटी स्टँडमधील प्लॉट क्रमांक २३ जवळील नॅचरल पाणी बॉटल दुकानासमोर गंभीर जखमी अवस्थेत आढळून आले होते.
अज्ञात व्यक्तीने अज्ञात कारणावरून त्यांच्या डोक्यावर कठीण वस्तूने वार करून त्यांना गंभीर दुखापत केली. या हल्ल्यात त्यांचा मृत्यू झाला.घटनेची माहिती मिळताच फौजदार चावडी पोलिसांनी घटनास्थळी धाव घेत पंचनामा केला. मृत व्यक्तीचा मुलगा प्रकृती कृष्णप्रसाद (वय २१) याने दिलेल्या फिर्यादीवरून भारतीय न्याय संहिता कलम १०३ अन्वये अज्ञात आरोपीविरुद्ध खुनाचा गुन्हा दाखल करण्यात आला आहे.सोलापूरच्या मध्यवर्ती भागात घडलेल्या या घटनेमुळे नागरिकांमध्ये भीतीचे वातावरण निर्माण झाले आहे. घटनास्थळ परिसरातील सीसीटीव्ही फुटेज तसेच इतर तांत्रिक पुराव्यांच्या आधारे पोलिसांनी तपास सुरू केला असून आरोपीचा शोध घेण्यासाठी विशेष पथके कार्यरत करण्यात आली आहेत.तर पुडिल तपास पाटील हे करीत आहेत..
