सोलापूर : सोलापूर जिल्हा परिषद माध्यमिक शिक्षण विभाग (योजना)च्या शिक्षणाधिकारी सुलभा पांडुरंग वठारे यांची शासनाने मिरा-भाईंदर महानगरपालिका येथे शिक्षणाधिकारी म्हणून बदली केली आहे. त्यांच्या कार्यकाळात शिक्षण विभागातील विविध योजना प्रभावीपणे राबविण्यासोबतच प्रशासकीय कामकाजाला गती मिळाली. त्यांच्या बदलीमुळे शिक्षक आणि शिक्षण विभागातील कर्मचाऱ्यांमध्ये संमिश्र भावना व्यक्त होत आहेत.
जिल्हा परिषदेचे मुख्य कार्यकारी अधिकारी कुशल जैन यांनी मंजूर केलेल्या प्रस्तावानुसार सुलभा वठारे यांच्याकडे काही काळ जिल्हा दिव्यांग कल्याण अधिकारी पदाचाही अतिरिक्त कार्यभार सोपविण्यात आला होता. या जबाबदारीतही त्यांनी विविध प्रकरणांचा वेळेत निपटारा करत दिव्यांग नागरिकांना शासकीय योजनांचा लाभ मिळवून देण्यासाठी विशेष प्रयत्न केले. त्यामुळे त्या विभागातील त्यांच्या कामाचीही प्रशंसा झाली.शिक्षण क्षेत्रातील नियोजन, शिस्तबद्ध प्रशासन, शिक्षकांशी सातत्यपूर्ण समन्वय आणि लोकाभिमुख कामकाज ही त्यांच्या कार्यशैलीची वैशिष्ट्ये मानली जातात.
प्रलंबित कामे मार्गी लावणे, विविध शासकीय योजनांची प्रभावी अंमलबजावणी आणि कार्यालयीन कामकाजात पारदर्शकता राखण्यावर त्यांनी विशेष भर दिला.मिरा-भाईंदर महानगरपालिकेतील नव्या जबाबदारीतही त्या आपल्या अनुभवाचा ठसा उमटवतील, असा विश्वास शिक्षण क्षेत्रातील अधिकारी, शिक्षक आणि कर्मचाऱ्यांकडून व्यक्त केला जात आहे. त्यांच्या कार्यकाळात सोलापूर जिल्हा परिषदेत केलेल्या उल्लेखनीय कामाची आठवण कायम राहील, अशा भावना अनेकांनी व्यक्त केल्या आहेत.
