नेहरू नगर हादरले; आत्महत्येमागील कारण गुलदस्त्यात, रेल्वे पोलिसांकडून सर्व बाजूंनी तपास सुरू
सोलापूर :सोलापूर शहरात रविवारी पहाटे घडलेल्या एका हृदयद्रावक घटनेने संपूर्ण शहर हळहळले आहे. सुशील नगर परिसरातील ३३ वर्षीय महिलेने आपल्या १४ वर्षीय अल्पवयीन मुलीसह रेल्वेखाली आत्महत्या केल्याची धक्कादायक घटना उघडकीस आली. या दुर्दैवी घटनेत वर्षा पांडुरंग आढतराव (वय ३३) आणि त्यांची मुलगी स्वरा पांडुरंग आढतराव (वय १४) या दोघींचा जागीच मृत्यू झाला.मिळालेल्या माहितीनुसार, दि. २६ जुलै २०२६ रोजी पहाटेच्या सुमारास शहरातील रेल्वे मार्गावर ही घटना घडली.
रेल्वेगाडीखाली आल्याने दोघींचा जागीच मृत्यू झाला. घटनेची माहिती मिळताच रेल्वे पोलीस तातडीने घटनास्थळी दाखल झाले. पोलिसांनी पंचनामा करून दोन्ही मृतदेह ताब्यात घेत शवविच्छेदनासाठी श्री छत्रपती शिवाजी महाराज सर्वोपचार रुग्णालयात पाठविले.प्राथमिक तपासात ही आत्महत्या असल्याचा अंदाज व्यक्त करण्यात येत असला, तरी हे टोकाचे पाऊल उचलण्यामागील नेमके कारण अद्याप समोर आलेले नाही. कौटुंबिक वाद, आर्थिक अडचण, मानसिक तणाव किंवा इतर कोणते कारण होते का, याचा रेल्वे पोलीस विविध अंगांनी तपास करीत आहेत. संबंधित कुटुंबीय व नातेवाईकांचे जबाबही नोंदविण्याचे काम सुरू असल्याची माहिती पोलिसांनी दिली.घटनेची माहिती परिसरात वाऱ्यासारखी पसरताच सुशील नगरमध्ये शोककळा पसरली.
आईने आपल्या अल्पवयीन मुलीसह आयुष्य संपविल्याच्या घटनेमुळे नागरिकांमध्ये हळहळ व्यक्त होत असून, अनेकांनी या घटनेबद्दल तीव्र दुःख व्यक्त केले आहे.दरम्यान, रेल्वे पोलिसांनी आकस्मिक मृत्यूची नोंद (ADR) करून पुढील तपास सुरू केला असून, शवविच्छेदन अहवाल आणि तपासानंतरच आत्महत्येमागील नेमके कारण स्पष्ट होणार असल्याचे सांगण्यात आले आहे. या घटनेने सोलापूर शहरात मोठी खळबळ उडाली असून, पहाटेची ही शोकांतिका सर्वांनाच अस्वस्थ करून गेली आहे.
