आदिला नदी-नाला वाद चिघळला; १५ दिवसांत निर्णय न झाल्यास आंदोलन..!

नरेड- ब्ल्यू लाईन रेखांकनाला विरोध

सोलापूर आदिला नदी की नाला, याबाबत प्रशासनाने स्पष्ट भूमिका जाहीर करावी, तसेच प्रस्तावित रेड- ब्ल्यू लाईन रेखांकन प्रक्रिया तात्काळ स्थगित करावी, अशी मागणी आदिला नदी संघर्ष समितीने केली आहे. यासंदर्भात प्रशासनाला १५ दिवसांचा अवधी देण्यात आला असून, ठोस निर्णय न झाल्यास व्यापक जनआंदोलन छेडण्याचा इशारा समितीने दिला आहे.मंगळवारी झालेल्या पत्रकार परिषदेत संघर्ष समितीच्या पदाधिकाऱ्यांनी गतवर्षीच्या पावसाळ्यात आदिला परिसरात निर्माण झालेल्या पूरस्थितीचा उल्लेख करत नदीपात्राची तातडीने साफसफाई करण्याची मागणी केली.

नदी अथवा नाल्याची खोली आणि रुंदी वाढविण्यासह पाण्याचा प्रवाह अडविणारी अतिक्रमणे व अनधिकृत पूल हटविण्याची गरज असल्याचे त्यांनी सांगितले.समितीच्या मते, महापालिकेकडून प्रस्तावित करण्यात आलेल्या रेड- ब्ल्यू लाईन रेखांकनामुळे आदिला परिसरातील मोठ्या क्षेत्रावर बांधकाम निर्बंध लागू होण्याची शक्यता आहे. बाळे, वसंत विहारसह नदीकाठच्या अनेक भागांतील नागरिक, शेतकरी, प्लॉटधारक आणि व्यावसायिक यावर परिणाम होऊ शकतो. त्यामुळे ही प्रक्रिया राबविण्यापूर्वी सर्व संबंधित घटकांचा विचार करून पुनर्विलोकन करावे, अशी मागणी करण्यात आली.

संघर्ष समितीने दावा केला की, प्रस्तावित रेखांकनामुळे सुमारे १,२०० एकर क्षेत्र प्रभावित होऊ शकते. यामध्ये जवळपास २०० गट क्रमांक तसेच ८०० ते ९०० मिळकतींचा समावेश असून हजारो नागरिकांच्या मालमत्ता आणि गुंतवणुकीवर अनिश्चिततेचे संकट निर्माण होऊ शकते. यावेळी समितीच्या पदाधिकाऱ्यांनी प्रशासनाने लोकप्रतिनिधी, नागरिक आणि तज्ज्ञांच्या उपस्थितीत खुली चर्चा आयोजित करून या प्रश्नावर तोडगा काढावा, अशी मागणीही केली.