सोलापूर : सोलापूर विधानपरिषद मतदारसंघात भाजपकडून बार्शीचे माजी आमदार राजेंद्र राऊत यांना उमेदवारी जाहीर केली. या मतदारसंघातील माजी आमदार, पंढरपूरचे नेते, प्रशांत परिचारक यांनी पुन्हा संधी मिळवण्यासाठी शर्थीचे प्रयत्न केले. पण, परिचारकांच्या पदरी पुन्हा निराशा हाती आली आहे.आज ( १ मे ) राजेंद्र राऊत यांनी सोलापूर जिल्हाधिकारी कार्यालय येथे उमेदवारी अर्ज दाखल केला आहे. यावेळी पालकमंत्री जयकुमार गोरे, माजी पालकमंत्री विजयकुमार देशमुख, माजी आमदार राजन पाटील, आमदार सचिन कल्याणशेट्टी, आमदार बाबासाहेब देशमुख, माजी आमदार शहाजीबापू पाटील, माजी आमदार राम सातपुते, माजी आमदार दीपक साळुंखे, माजी आमदार दिलीप माने उपस्थित होते.
राऊतांचा अर्ज भरताना सोलापूर जिल्ह्यातील बडे नेते उपस्थित असताना प्रशांत परिचारक मात्र गैरहजर होते. त्यातून प्रशांत परिचारक हे नाराज असल्याचं दिसून आलं. परंतु, प्रशांत परिचारकरांना संधी नाकारल्यानंतर पालकमंत्री जयकुमार गोरे यांनी प्रतिक्रिया दिली आहे. ते प्रसारमाध्यमांशी संवाद साधत होते.पालकमंत्री गोरे म्हणाले, “राजेंद्र राऊतांसारख्या नेत्याला संधी दिल्याबद्दल मी देवेंद्र फडणवीसांचे आभार मानतो. आणखी काहीजण इच्छुक होते, त्यांनाही पक्ष म्हणून भविष्यात संधी देऊ. महायुती म्हणून मोठ्या फरकानं आम्ही निवडणूक जिंकू.”“भाजपचा विस्तार आणि ताकद मोठी आहे.
तिकीट मिळालं की आमदार होऊन जाऊ, अशी भूमिका माझ्या सहकाऱ्यांची राहते. एकच उमेदवार होता; त्याबाबत पक्षानं निर्णय घेतला. आता आम्ही सगळे मिळून राऊतांना निवडून आणण्यासाठी प्रयत्न करू. इच्छुक असणारे महत्त्वाचीच लोक आहेत. त्यांना पक्ष म्हणून आम्ही भविष्यात संधी देऊ,” असे उत्तर प्रशांत परिचारकांच्या प्रश्नावर जयकुमार गोरेंनी दिलं आहे.
