सोलापूर, :सोलापूर शहर व जिल्ह्यात बेकायदेशीर वाहतूक, अवैध प्रवासी वाहतूक तसेच वैध कागदपत्रे व परवाने न बाळगता वाहने चालविणाऱ्यांविरोधात प्रादेशिक परिवहन कार्यालयाच्या वायुवेग पथकाने विशेष तपासणी मोहीम राबवून २०२ वाहनांवर एकूण २० लाख २७ हजार रुपयांची दंडात्मक कारवाई केली. वाहतुकीचे नियम धाब्यावर बसवून अवैध वाहतूक सुरू असल्याच्या तक्रारी प्रादेशिक परिवहन कार्यालयाकडे वारंवार प्राप्त होत होत्या. या तक्रारींची गंभीर दखल घेत महाराष्ट्र राज्याचे परिवहन मंत्री, परिवहन आयुक्त यांच्या निर्देशानुसार तसेच प्रादेशिक परिवहन अधिकारी, सोलापूर यांच्या मार्गदर्शनाखाली ही विशेष मोहीम हाती घेण्यात आली.
या मोहिमेसाठी प्रादेशिक परिवहन कार्यालयाची सहा वायुवेग पथके आणि एसटी पथक तैनात करण्यात आले होते. शहर व जिल्ह्यातील विविध भागांत राबविण्यात आलेल्या या कारवाईत रस्ते सुरक्षा आणि वाहतूक नियमांचे उल्लंघन करणाऱ्या चालकांवर मोटार वाहन कायद्यानुसार कडक कारवाई करण्यात आली.
अवैध वाहतुकीमुळे रस्ते सुरक्षेचा प्रश्न गंभीर बनत असल्याने अशा प्रकारची धडक मोहीम पुढेही सातत्याने सुरू राहणार असल्याचे प्रादेशिक परिवहन कार्यालयाने स्पष्ट केले आहे. वाहनधारकांनी वाहनांची वैध कागदपत्रे, विमा आणि चालक परवाना जवळ बाळगून वाहतुकीच्या नियमांचे काटेकोर पालन करावे, असे आवाहनही करण्यात आले आहे
