सोलापूर : शहरातील नेहरूनगर परिसरातील श्री सुशीलकुमार शिंदे कॉलेज ऑफ फिजिकल एज्युकेशन महाविद्यालयात केंद्र शासनाच्या पोस्ट मॅट्रिक शिष्यवृत्ती योजनेत मोठा गैरव्यवहार झाल्याचा प्रकार उघडकीस आला आहे. अल्पसंख्याक विद्यार्थ्यांसाठी असलेल्या शिष्यवृत्ती योजनेत २३ बनावट विद्यार्थी दाखवून शासनाची १ लाख ८३ हजार ९०० रुपयांची फसवणूक केल्याप्रकरणी विजापूर नाका पोलिस ठाण्यात गुन्हा दाखल करण्यात आला आहे. याप्रकरणी संजय कोंडिबा भांडगे (वय ५०, रा. जुने कलेक्टर कंपाऊंड, सोलापूर) यांनी फिर्याद दिली असून, आरोपी इंदिरराजे भोसले यांच्याविरुद्ध फसवणुकीसह विविध कलमान्वये गुन्हा नोंदविण्यात आला आहे.
पोलिसांनी दिलेल्या माहितीनुसार, हा प्रकार १ ऑगस्ट २०२१ ते ३१ जुलै २०२३ या कालावधीत घडला. आरोपीने बनावट युजर आयडी तयार करून स्वतःला संस्थेचा प्रमुख व इन्स्टिट्यूट नोडल अधिकारी असल्याचे भासवले. त्यानंतर अल्पसंख्याक विद्यार्थ्यांची बनावट कागदपत्रे तयार करून २३ विद्यार्थ्यांच्या नावाने शिष्यवृत्तीचे ऑनलाइन अर्ज भरले. शासनाकडून मंजूर झालेली शिष्यवृत्ती स्वतःकडे वळवून आर्थिक फसवणूक केल्याचा आरोप आहे. या प्रकरणाचा तपास विजापूर नाका पोलिस ठाण्याचे पोलिस निरीक्षक यांच्या मार्गदर्शनाखाली सुरू असून, या गैरव्यवहारात आणखी कोणी सहभागी आहे का, याचाही तपास पोलिसांकडून करण्यात येत आहे.
