सोलापूर-गोवा विमानसेवा ‘हाऊसफुल’; तिकीटदर थेट १२ हजारांवर!

१० जूनपर्यंत बहुतांश आसने फुल्ल, ऑगस्ट-सप्टेंबरचेही बुकिंग सुरू

सोलापूर, : सोलापूरकरांची गोवा पर्यटनासाठीची पसंती आता हवाई मार्गाकडे झुकत असल्याचे चित्र दिसून येत आहे. सोलापूर-गोवा विमानसेवेला मिळणाऱ्या उत्स्फूर्त प्रतिसादामुळे या मार्गावरील बहुतांश उड्डाणे ‘हाऊसफुल’ होत असून, वाढत्या मागणीमुळे तिकीटदर थेट १२ हजार रुपयांपर्यंत पोहोचले आहेत. विशेष म्हणजे, येत्या ९ जून रोजी या विमानसेवेला एक वर्ष पूर्ण होत असून या कालावधीत १४ हजारांहून अधिक प्रवाशांनी या सेवेचा लाभ घेतला आहे.

सोलापूर विमानतळावरून फ्लाय कंपनीमार्फत सुरू करण्यात आलेल्या या विमानसेवेला पहिल्याच दिवसापासून प्रवाशांचा चांगला प्रतिसाद मिळाला. सुरुवातीला ६० ते ७० टक्के असलेली आसनभरती आता अनेकदा शंभर टक्क्यांपर्यंत पोहोचत आहे. डिसेंबर- जानेवारीनंतर मे आणि जून महिन्यातही विमानसेवा पूर्ण क्षमतेने भरत असल्याचे दिसून येत आहे.

उन्हाळी सुट्ट्यांच्या पार्श्वभूमीवर गोवा पर्यटनासाठी मोठ्या प्रमाणावर बुकिंग होत आहे. परिणामी १० जूनपर्यंतच्या बहुतांश आसनांचे आरक्षण पूर्ण झाले असून, राखीव कोट्यातून उपलब्ध होणाऱ्या तिकिटांसाठी प्रवाशांना मोठी किंमत मोजावी लागत आहे. काही तिकिटांचे दर २,७०० रुपयांपासून थेट १२ हजार रुपयांपर्यंत पोहोचल्याचे समोर आले आहे. ही विमानसेवा हैदराबादमार्गे चालविली जात असल्याने गोव्याबरोबरच हैदराबादसाठीही प्रवाशांची संख्या वाढली आहे. उपलब्ध उड्डाणांच्या दिवशी हैदराबादला जाणाऱ्या आणि तेथून सोलापूरला येणाऱ्या प्रवाशांचे प्रमाण ४० ते ६० टक्क्यांपर्यंत असल्याचे दिसून येत आहे.