पुणे विमानतळावर स्लॉट मिळूनही उड्डाणाला विलंब; पावसाळ्यानंतरच निर्णयाची शक्यता
सोलापूर : तिरुपती बालाजीच्या दर्शनासाठी थेट विमानसेवेची आतुरतेने वाट पाहणाऱ्या सोलापूरकरांची प्रतीक्षा आणखी लांबणार असल्याचे चित्र आहे. जूनच्या पहिल्या आठवड्यात सुरू होण्याची अपेक्षा असलेली पुणे–सोलापूर–तिरुपती विमानसेवा अद्यापही कागदावरच असून विमान कंपन्यांच्या नियोजनातील विलंबामुळे या मार्गावरील उड्डाणाला ब्रेक लागला आहे.
स्टार एअर कंपनीला पुणे विमानतळावर व्यावसायिक उड्डाणांसाठी आवश्यक स्लॉट मिळाल्यानंतर पुणे, सोलापूर आणि तिरुपती या शहरांना जोडणारी विमानसेवा सुरू होण्याचा मार्ग मोकळा झाला होता. त्यामुळे सोलापूरकरांमध्ये मोठी उत्सुकता निर्माण झाली होती. मात्र, उड्डाणांचे वेळापत्रक, बुकिंग व्यवस्था आणि मनुष्यबळ नियोजन अद्याप अंतिम झाले नसल्याने सेवा सुरू होण्यास विलंब होत आहे. दरम्यान, फ्लाय ९१ एअरलाईन्सचे व्यवस्थापकीय संचालक मनोज चाको यांनी तिरुपती विमानसेवेबाबत पावसाळ्यानंतरच सकारात्मक विचार केला जाईल, असे स्पष्ट केले आहे. त्यामुळे यंदाच्या आषाढीपूर्वी तिरुपतीसाठी थेट विमानसेवा सुरू होण्याची शक्यता धूसर झाली आहे.
प्रवाशांचा वाढता प्रतिसाद; कंपन्यांची सावध भूमिका
सोलापूरच्या होटगी रस्ता विमानतळावरून सध्या सुरू असलेल्या मुंबई, हैदराबाद आणि गोवा विमानसेवेला प्रवाशांचा उत्स्फूर्त प्रतिसाद मिळत आहे. व्यावसायिक, उद्योजक, पर्यटक आणि सर्वसामान्य प्रवाशांकडून या सेवांचा मोठ्या प्रमाणात वापर होत असल्याने विमान कंपन्यांनाही चांगला प्रतिसाद मिळत आहे. तिरुपती बालाजीच्या दर्शनासाठी सोलापूर आणि परिसरातून दरवर्षी हजारो भाविक प्रवास करतात. त्यामुळे या मार्गावर विमानसेवा सुरू झाल्यास प्रवाशांची संख्या लक्षणीय राहील आणि विमान कंपन्यांना चांगला महसूल मिळू शकतो, असा विश्वास विमान वाहतूक क्षेत्रातील जाणकार व्यक्त करत आहेत.
