सोलापूर : पुण्यश्लोक अहिल्यादेवी होळकर यांच्या स्मारक उभारणीच्या रखडलेल्या कामावरून सोमवारी पुण्यश्लोक अहिल्यादेवी होळकर सोलापूर विद्यापीठाच्या बैठकीत सदस्यांनी प्रशासनाला चांगलेच धारेवर धरले. वारंवार पाठपुरावा करूनही स्मारकाच्या कामाला गती मिळत नसल्याने सदस्यांनी तीव्र नाराजी व्यक्त करत तातडीने ठोस निर्णय घेण्याची मागणी केली.
अहिल्यादेवी होळकर यांच्या नावाने ओळखल्या जाणाऱ्या विद्यापीठातच त्यांच्या स्मारकाची उभारणी वर्षानुवर्षे प्रलंबित राहणे योग्य नसल्याचे मत अनेक सदस्यांनी नोंदविले. स्मारक उभारणीचा विषय केवळ बांधकामापुरता मर्यादित नसून तो विद्यापीठाच्या गौरवशाली इतिहासाशी आणि सामाजिक बांधिलकीशी संबंधित असल्याचेही सदस्यांनी स्पष्ट केले.
बैठकीत सदस्य शरू हांडे यांनी आक्रमक भूमिका घेत प्रशासनाच्या निष्क्रियतेवर प्रश्नचिन्ह उपस्थित केले. कुलगुरूंसमोर भंडारा उधळून त्यांनी निषेध व्यक्त केला. स्मारकासंदर्भात अनेकदा चर्चा होऊनही प्रत्यक्षात कोणतीही लक्षणीय प्रगती दिसून येत नसल्याबद्दल त्यांनी प्रशासनाकडे जाब विचारला. सदस्यांनी स्मारकाच्या प्रस्तावाची सद्यस्थिती, निधी उपलब्धतेची माहिती, प्रशासकीय व तांत्रिक मंजुरीची प्रक्रिया तसेच काम सुरू होण्याचा निश्चित कालावधी जाहीर करण्याची मागणी केली. याबाबत स्पष्ट आराखडा सादर करण्याची अपेक्षाही व्यक्त करण्यात आली.
दरम्यान, विद्यापीठ प्रशासनाने स्मारक उभारणीसंदर्भातील प्रक्रियेचा आढावा घेऊन आवश्यक ती कार्यवाही करण्यात येईल, अशी भूमिका बैठकीत मांडल्याचे समजते. मात्र, आश्वासनांपलीकडे जाऊन प्रत्यक्ष कामाला सुरुवात कधी होते, याकडे आता विद्यापीठ परिवारासह अहिल्यादेवींच्या अनुयायांचे लक्ष लागले आहे.
