सोलापूर : विधान परिषदेची निवडणूक जाहीर झाली. सोमवार एक जून रोजी उमेदवारी अर्ज दाखल करण्याचा शेवटचा दिवस आहे. भाजपने अद्याप सोलापूरसाठी उमेदवाराचं नाव जाहीर केले नसले तरी राजकीय वर्तुळातून ज्या उमेदवाराचे नाव आघाडीवर आहे त्या उमेदवाराचे नाव आहे प्रशांत परिचारक.रविवारी राज्यातील महायुतीच्या प्रमुख नेत्यांची बैठक झाली.
या बैठकीत राज्यातील जागा वाटपाबाबत चर्चा करण्यात आल्यानंतर कोणत्या पक्षाने कोणत्या जिल्ह्याची जागा लढवायची याबाबत निर्णय झाला. उमेदवार निवडताना जातीय समीकरणांचे गणित घालण्यात येणार आहे. त्यानुसार सोलापूरची जागा ब्राह्मण समाजाला म्हणजेच प्रशांत परिचारकांना मिळण्याची दाट शक्यता वर्तवण्यात येत आहे. पुढील अडीच वर्षानंतर होत असलेल्या विधानसभा निवडणुकीत भाजपाकडून बार्शी विधानसभा मतदार संघासाठी राजेंद्र राऊत हेच उमेदवार असतील त्यामुळे त्यांना विधान परिषदेची उमेदवारी देण्यात येणार नसल्याचे सूत्रांनी सांगितले.
दरम्यान परिचारक व राऊत यांना उमेदवारी न दिल्यास एक धक्कादायक नाव ही समोर येऊ शकते अशी ही कुजबूज आता सुरू झाली आहे.सोमवारी सोलापुरात पालकमंत्री जयकुमार गोरे यांच्या उपस्थितीत काही प्रमुख नेत्यांची बैठक होणार आहे. या बैठकीत अंतिम उमेदवार ठरेल अशी माहिती जिल्हाध्यक्ष शशिकांत चव्हाण यांनी माध्यमांना दिल्याचे वृत्त आहे.पालकमंत्री जयकुमार गोरे यांच्या उपस्थितीत परिचारक सोमवारी दुपारी विधान परिषदेची उमेदवारी दाखल करणार असल्याचेही सांगण्यात आले.
