सोलापूर : खडतर आणि आव्हानात्मक समजल्या जाणाऱ्या सातारा हिल मॅरेथॉनमध्ये सोलापूरच्या सायकल रायडर्स ग्रुपने दमदार कामगिरी करत आपल्या जिद्दीचा, सातत्याचा आणि फिटनेसचा ठसा उमटवला. ६ सप्टेंबर रोजी झालेल्या या स्पर्धेत ग्रुपच्या अनेक सदस्यांनी मॅरेथॉन यशस्वीरीत्या पूर्ण केली.
डॉ. रूपाली जोशी यांनी सलग पाचव्यांदा सातारा हिल मॅरेथॉन पूर्ण करून ‘फिनिशर’ होण्याचा मान मिळवला. त्यांच्या या सातत्यपूर्ण कामगिरीने सोलापूरच्या महिला डॉक्टरांसह अनेक महिलांसाठी एक प्रेरणादायी आदर्श निर्माण केला आहे. ज्योती यमाजी यांनी अवघ्या २ तास २६ मिनिटांत मॅरेथॉन पूर्ण करत सिल्व्हर मेडल पटकावले.
याशिवाय सायकल रायडर्स ग्रुपचे प्रवीण जवळकर, दादाराव इंगळे, कृष्णा सुळे, अविनाश कुरापाटी, डॉ. ऋषिकेश चौगुले, जतीन पटेल, अंबरीशी कदम, रंजना घोडके, विमल ढेरे, संजय ढेरे, डॉ. राहुल वाडेकर आणि डॉ. हर्षवर्धन जोशी यांनीही मॅरेथॉन यशस्वीरीत्या पूर्ण करत ग्रुपच्या शिरपेचात आणखी एक मानाचा तुरा रोवला.
‘Fitness with Real Happiness’ हे ब्रीदवाक्य घेऊन सायकल रायडर्स ग्रुप सायकलिंग आणि रनिंगच्या माध्यमातून समाजात व्यायाम, फिटनेस आणि आरोग्याबाबत जनजागृतीचे कार्य करत आहे. याच ग्रुपचे प्रकाश गिरी आणि राहुल कुंभार यांनी बार्शी सायकलिंग क्लबच्या सलग १००० किलोमीटर सायकलिंग चॅलेंजमध्ये अनुक्रमे 55 आणि 42 तासांत आव्हान पूर्ण करत यश मिळवले आहे. रनिंग असो वा सायकलिंग—फिटनेस, जिद्द आणि सातत्याच्या जोरावर सायकल रायडर्स ग्रुपची प्रेरणादायी वाटचाल सुरू आहे. या उल्लेखनीय कामगिरीबद्दल सोलापूरच्या क्रीडा क्षेत्रातून ग्रुपचे सर्वत्र कौतुक होत आहे.
