सोलापूर | महानगरपालिका प्रभाग क्रमांक २२ मधील सेटलमेंट फ्री कॉलनी, चव्हाण वस्ती परिसरातील श्रीकृष्ण अध्यात्मिक मठात श्रीकृष्ण जन्माष्टमीनिमित्त विविध धार्मिक कार्यक्रमांचे आयोजन करण्यात आले होते. शनिवारी दुपारी आयोजित करण्यात आलेला भक्तिमय गुलाल सोहळा उत्साहपूर्ण व भक्तिमय वातावरणात पार पडला.सोहळ्याच्या प्रारंभी संपूर्ण सेटलमेंट परिसरातून नगरप्रदक्षिणा काढण्यात आली.
‘गोविंदा’च्या जयघोषात भाविकांनी मोठ्या संख्येने सहभागी होत उत्स्फूर्त प्रतिसाद दिला. नगरप्रदक्षिणेमुळे संपूर्ण परिसरात भक्तिमय वातावरण निर्माण झाले होते.या सोहळ्यास १०३ वर्षीय ह.भ.प. शिवलाल स्वामी महाराज यांची विशेष उपस्थिती लाभली. त्यांनी उपस्थित भाविकांना श्रीकृष्ण जन्माष्टमीचे आध्यात्मिक व धार्मिक महत्त्व सांगितले. भगवान श्रीकृष्णांनी दिलेला प्रेम, भक्ती, कर्म, सत्य आणि धर्माचा संदेश प्रत्येकाने आचरणात आणावा, असे आवाहन त्यांनी केले. श्रद्धेसोबत सदाचाराची जोड असल्यास जीवनाला सकारात्मक दिशा मिळते, असा संदेशही त्यांनी दिला.दरम्यान, पोलीस आयुक्त एम. राजकुमार यांनी श्रीकृष्ण भगवानांचे दर्शन घेऊन आशीर्वाद घेतला. तसेच ह.भ.प. शिवलाल स्वामी महाराजांचे आशीर्वाद घेत उपस्थित भाविकांना जन्माष्टमीच्या शुभेच्छा दिल्या.जन्माष्टमीनिमित्त भाविकांसाठी महाप्रसादाचे आयोजन करण्यात आले होते.
उपस्थित मान्यवरांच्या हस्ते महाप्रसादाचे पूजन करण्यात आले.यावेळी उपमहापौर ज्ञानेश्वरी देवकर, पोलीस आयुक्त एम. राजकुमार, डॉ. सूर्यप्रकाश कोठे, भाजपचे ज्येष्ठ नेते दिलीप कोल्हे, प्रभाग क्रमांक २२ चे भाजपा नगरसेवक किसन जाधव, नागेश मामा बाबुराव गायकवाड, सलगर वस्ती पोलीस ठाण्याचे वरिष्ठ पोलीस निरीक्षक श्रीशैल गजा, लहू गायकवाड, सुधीर बहिरवाडे, श्रीकांत श्रीराम जाधव, सचिन विलास जाधव यांच्यासह वारकरी संप्रदायातील भक्तगण, विविध क्षेत्रांतील मान्यवर आणि मोठ्या संख्येने भाविक उपस्थित होते.
