सोलापूर : गणेशोत्सवाच्या पार्श्वभूमीवर शहरात गस्त सुरू असताना सोलापूर शहर गुन्हे शाखेने मोठी कारवाई करत दरोडा टाकण्याच्या तयारीत घातक शस्त्रांसह जमलेल्या सात जणांना ताब्यात घेतले. एमआयडीसी पोलिस ठाण्याच्या हद्दीतील अमर ज्योती नगर परिसरात ही कारवाई करण्यात आली. संशयितांकडून एक देशी पिस्तूल, पाच जिवंत काडतुसे, दोन तलवारी, तीन खंजीर, सात मोबाईल, महिंद्रा एक्सयूव्ही-५०० कार आणि मोटारसायकल असा एकूण १० लाख २९ हजार ७०० रुपयांचा मुद्देमाल जप्त करण्यात आला आहे.गणेशोत्सवाच्या पार्श्वभूमीवर गुन्हे शाखेचे पथक शहरात गस्त घालत असताना अमर ज्योती नगर परिसरात काही संशयित व्यक्ती घातक शस्त्रांसह दरोडा टाकण्याच्या तयारीत जमल्याची माहिती सहायक पोलिस निरीक्षक भरत चंदनशिव आणि पोलिस शिपाई अमोल यादव यांना मिळाली. माहितीची खातरजमा करून गुन्हे शाखेच्या पथकाने परिसरात सापळा रचला.
पोलिस पथकाने संशयितांवर कारवाई करत मनदीपसिंग संघू (नांदेड), बलप्रीतसिंग खैरा (नांदेड), अंकुरसिंग (बिहार), लक्ष्मण जगताप (औरंगाबाद), सुखदेवसिंग गिल (पंजाब), दिलीपसिंग पवार (नांदेड) आणि राजेश राठोड (सोलापूर) या सात जणांना ताब्यात घेतले.कारवाईदरम्यान आरोपींकडून एक देशी बनावटीचे पिस्तूल आणि पाच जिवंत काडतुसे, दोन तलवारी, तीन खंजीर, सात मोबाईल फोन, महिंद्रा एक्सयूव्ही-५०० कार आणि मोटारसायकल असा मुद्देमाल पोलिसांनी जप्त केला. या कारवाईमुळे गणेशोत्सवाच्या काळात शहरात संभाव्य गुन्हेगारी घटना घडविण्याचा प्रयत्न उधळून लावण्यात पोलिसांना यश आल्याचे सांगण्यात आले.
पोलिसांच्या प्राथमिक तपासात संबंधित संशयितांकडून सोलापुरात दरोडा टाकण्याची योजना आखण्यात आल्याचे समोर आल्याचे पोलिसांनी सांगितले आहे. त्यामुळे या टोळीचा नेमका उद्देश काय होता, दरोड्याचे संभाव्य लक्ष्य कोणते होते आणि या कटात आणखी कोणाचा सहभाग आहे का, याचा तपास पोलिसांकडून सुरू आहे.अटक करण्यात आलेल्या आरोपींपैकी काही जणांवर यापूर्वी खून, खुनाचा प्रयत्न, घरफोडी आणि जबरी चोरीसारखे गंभीर गुन्हे दाखल असल्याची माहिती पोलिसांनी दिली आहे. त्यामुळे या सात जणांच्या पूर्वीच्या गुन्हेगारी पार्श्वभूमीचीही पोलिसांकडून पडताळणी केली जात आहे.याप्रकरणी एमआयडीसी पोलिस ठाण्यात गुन्हा दाखल करण्यात आला असून सातही आरोपींना अटक करण्यात आली आहे. जप्त करण्यात आलेली शस्त्रे आणि वाहनांचा या प्रकरणाशी नेमका संबंध काय, याचाही तपास सुरू आहे.
गणेशोत्सवाच्या पार्श्वभूमीवर शहरात कायदा व सुव्यवस्था अबाधित ठेवण्यासाठी पोलिसांकडून गस्त आणि संशयितांवर नजर ठेवण्याची मोहीम सुरू आहे. त्याचदरम्यान मिळालेल्या गोपनीय माहितीच्या आधारे ही कारवाई करण्यात आली. ही कारवाई पोलिस आयुक्त एम. राज कुमार, डॉ. अश्विनी पाटील, दिलीप पवार आणि अरविंद माने यांच्या मार्गदर्शनाखाली गुन्हे शाखेच्या पथकाने केली. या कारवाईमुळे शहरातील गुन्हेगारी कारवायांवर पोलिसांची करडी नजर असल्याचे स्पष्ट झाले आहे.
