पुणे-सोलापूर महामार्गावर सापटणेजवळ भीषण अपघात; दोन तरुण गंभीर जखमी
सोलापुर ; पुणे-सोलापूर राष्ट्रीय महामार्गावर सापटणे गावाच्या हद्दीत एचपी पेट्रोल पंपाजवळ सोमवारी (दि. २१) दुपारी भीषण अपघात झाला. मोहोळहून टेंभुर्णीकडे भरधाव वेगाने जाणाऱ्या महिंद्रा स्कॉर्पिओने पुण्याच्या दिशेने जाणाऱ्या कंटेनरला पाठीमागून जोरदार धडक दिली. धडकेनंतर स्कॉर्पिओचा पुढील भाग कंटेनरखाली घुसून चक्काचूर झाला. या अपघातात मोहोळ येथील कर्ण महेश पवार (वय २३) याचा उपचारादरम्यान मृत्यू झाला असून अनिकेत लक्ष्मण धोत्रे (वय २३) आणि रोहित विजय मोरे (वय २१) हे दोघे गंभीर जखमी झाले आहेत.
मिळालेल्या माहितीनुसार, सोमवारी दुपारी सुमारे १२ वाजण्याच्या सुमारास स्कॉर्पिओ क्रमांक MH 42 BN 5112 मोहोळहून टेंभुर्णीच्या दिशेने जात होती. सापटणे गावाच्या हद्दीत एचपी पेट्रोल पंपाजवळ पुढे पुण्याच्या दिशेने जाणाऱ्या TS 08 UB 4478 क्रमांकाच्या कंटेनरला स्कॉर्पिओने पाठीमागून जोरदार धडक दिली.
धडक एवढी भीषण होती की स्कॉर्पिओचा पुढील भाग कंटेनरखाली अडकला. वाहनाचा पुढील भाग अक्षरशः चक्काचूर झाला आणि त्यातील तिन्ही तरुण वाहनातच अडकून पडले. अपघाताची माहिती मिळताच वरवडे टोलनाका येथील गस्तीपथक व महामार्ग पोलिस मदत केंद्राचे कर्मचारी घटनास्थळी दाखल झाले. अपघातग्रस्त स्कॉर्पिओ कंटेनरखाली अडकल्याने जखमींना बाहेर काढण्यासाठी मोठी कसरत करावी लागली. वरवडे टोल नाका येथील क्रेनच्या सहाय्याने वाहन कंटेनरखालून बाजूला काढण्यात आले. त्यानंतर स्कॉर्पिओचे दरवाजे तोडून गंभीर अवस्थेतील तिन्ही तरुणांना बाहेर काढण्यात आले.
जखमींपैकी दोघांना वरवडे टोल नाका येथील रुग्णवाहिकेतून डॉ. प्रशांत कारंजकर व रुग्णवाहिकाचालक सागर फाटे यांनी तातडीने उपचारासाठी टेंभुर्णी येथील खासगी रुग्णालयात दाखल केले. तर एका गंभीर जखमीला वेणेगाव येथील जगद्गुरु नरेंद्राचार्य महाराज संस्थान नानिजधामच्या रुग्णवाहिकेतून रुग्णालयात हलविण्यात आले. या अपघातात डोक्याला, पायाला व पोटाला जबर मार लागल्याने कर्ण महेश पवार (वय २३, रा. मोहोळ) हा गंभीर जखमी झाला होता. त्याच्यावर टेंभुर्णी येथील खासगी रुग्णालयात उपचार सुरू असताना त्याचा मृत्यू झाला. या घटनेमुळे मोहोळ परिसरात हळहळ व्यक्त होत आहे.
