नगरसेवकांचे मानधन दुष्काळग्रस्तांच्या पदरात पडणार का?

सोलापूर : जिल्ह्यात दुष्काळाची परिस्थिती गंभीर असताना सोलापूर महापालिकेतील नगरसेवकांना महागडे मोबाईल आणि विविध सुविधा देण्याऐवजी त्यांचे मानधन दुष्काळग्रस्तांच्या मदतीसाठी वापरावे, अशी मागणी पुढे आली आहे. शेतकरी आणि सर्वसामान्य नागरिक आर्थिक संकटाचा सामना करत असताना लोकप्रतिनिधींनीही सामाजिक बांधिलकी जपावी, असा सूर उमटत आहे. त्यामुळे महापालिकेच्या खर्चाला कात्री लावून दुष्काळग्रस्तांना मदतीचा हात देण्याच्या मागणीने आता जोर धरला आहे.

सोलापूर जिल्ह्यात दुष्काळामुळे शेतकरी, शेतमजूर आणि सर्वसामान्य नागरिक अडचणीत सापडल्याचे चित्र आहे. अशा परिस्थितीत महापालिकेच्या सर्व नगरसेवकांचे एक महिन्याचे मानधन दुष्काळग्रस्तांना देण्यात यावे, अशी मागणी करण्यात आली आहे. याशिवाय नगरसेवकांना देण्यात येणाऱ्या महागड्या मोबाईलसारख्या सुविधांवरही मर्यादा आणण्याची गरज व्यक्त होत आहे.विशेष म्हणजे, महापालिकेतील नव्या पदाधिकाऱ्यांनी याबाबत पुढाकार घ्यावा, अशी अपेक्षा व्यक्त केली जात आहे. नागरिकांच्या करातून जमा होणाऱ्या निधीचा वापर आवश्यक विकासकामे आणि लोकहिताच्या उपक्रमांसाठी व्हावा. अनावश्यक खर्च टाळून आर्थिक शिस्त राखण्याची जबाबदारी लोकप्रतिनिधींची असल्याचे मत व्यक्त होत आहे.

महापालिकेची विशेष सभा बोलावून सर्वपक्षीय एकमताने दुष्काळग्रस्तांच्या मदतीचा ठराव मंजूर करावा, अशी मागणी पुढे आली आहे. नगरसेवकांच्या मानधनातून जमा होणारी रक्कम जिल्हाधिकाऱ्यांकडे सुपूर्द करून तिचा वापर गरजूंच्या मदतीसाठी करावा, अशी अपेक्षा आहे. या निर्णयामुळे दुष्काळग्रस्तांना काही प्रमाणात दिलासा मिळण्याबरोबरच लोकप्रतिनिधींच्या सामाजिक बांधिलकीचा सकारात्मक संदेश जाऊ शकतो.

दरम्यान, महापालिकेतील पदाधिकाऱ्यांनी या मागणीची दखल घेऊन प्रत्यक्ष निर्णय घ्यावा, अशी अपेक्षा व्यक्त होत आहे. दुष्काळाच्या पार्श्वभूमीवर नगरसेवक स्वतःच्या सुविधांना प्राधान्य देणार की गरजूंच्या मदतीसाठी पुढाकार घेणार, याकडे नागरिकांचे लक्ष लागले आहे