सोलापूर : शनिवारी आलेल्या शनी अमावस्येनिमित्त सोलापूर शहर आणि परिसरातील शनी व मारुती मंदिरांमध्ये भाविकांची मोठी गर्दी झाली होती. विविध मंदिरांमध्ये पहाटेपासून अभिषेक, नवग्रह पूजा आणि अन्य धार्मिक कार्यक्रमांचे आयोजन करण्यात आले होते. भाविकांनी दर्शनासाठी गर्दी केली होती.
रेल्वे स्थानक परिसरातील शनी मंदिर, अक्कलकोट रस्त्यावरील शनी मंदिर, मधला मारुती, काळजापूर मारुती, सोन्या मारुती, जोडबसवण्णा मारुती आणि गौत्या मारुती मंदिरांत विविध धार्मिक कार्यक्रम पार पडले. रेल्वे स्थानक परिसरातील शनी मंदिरात पुजारी वे. कल्लय्या स्वामी, तर मधला मारुती मंदिरात हणमंत पुजारी यांच्या नेतृत्वाखाली दिवसभर धार्मिक विधी करण्यात आले. अक्कलकोट रस्त्यावरील शनी मंदिरात प्रभाकर फलमारी यांच्यासह अनेक भाविकांनी शनिदेवाला तैलाभिषेक केला. मंदिरांमध्ये दर्शनासाठी सकाळपासूनच भाविकांची वर्दळ होती. भाविकांकडून फळे आणि महाप्रसादाचे वितरण करण्यात आले. कुंभारी हद्दीतील यत्नाळ रस्त्यावरील बाल हनुमान मंदिरातही विविध धार्मिक कार्यक्रम झाले. शनी व मारुती मंदिरांमध्ये भक्तिमय वातावरण निर्माण झाले होते.
शनी अमावास्येचे हे आहे धार्मिक महत्त्व हिंदू पंचांगानुसार शनिवारी येणाऱ्या अमावस्येला शनी अमावस्या असे म्हटले जाते. या दिवशी शनिदेवाची पूजा, तैलाभिषेक, दानधर्म आणि गरजूंना मदत करणे याला धार्मिक परंपरेत महत्त्व आहे. शनिदेवाची उपासना केल्याने अडचणी दूर होतात आणि जीवनात स्थैर्य लाभते, अशी भाविकांची श्रद्धा आहे. या दिवशी काही भाविक मारुतीचे दर्शन घेऊन हनुमान चालीसा पठण आणि शनी स्तोत्राचे वाचन करतात.
