शालार्थच्या पडताळणीत १७ हजार कर्मचाऱ्यांचा ‘एरर’!

सोलापूर, : बनावट शालार्थ आयडी किंवा शिक्षणाधिकाऱ्यांची मान्यता घेऊन पगार घेणाऱ्यांना शोधण्यासाठी शालेश शिक्षण विभागाने राज्यातील चार लाख शिक्षक-शिक्षकेतर कर्मचाऱ्यांची कागदपत्रे ऑनलाइन मागविली. पडताळणीवेळी १६ ते १७हजार जणांच्या माहितीत ‘एरर’ दाखवत असल्याची बाब समोर आली आहे. या सर्वांना नोटिसा बजावल्या जाणार आहेत. त्यानंतर संबंधित कर्मचाऱ्यांना ती मूळ कागदपत्रे द्यावी लागणार आहेत.

नागपूर, नाशिकसह अनेक जिल्ह्यांमध्ये बनावट शालार्थ आयडी काढून पगार घेणारे शिक्षक-शिक्षकेतर कर्मचारी आढळले. यानंतर मुख्यमंत्र्यांनी ‘एसआयटी’ नेमली. तर शिक्षण विभागाने पोर्टल बनवून त्यावर शिक्षक-शिक्षकेतर कर्मचाऱ्यांचे नियुक्ती आदेश, वैयक्तिक आदेश शालार्थ आयडी आदेश, शिक्षणाधिकाऱ्यांची मान्यता, रूजू रिपोर्टसह पात्रतेची कागदपत्रे मागवून घेतली. ऑनलाइन प्रणालीत कागदपत्रांची पडताळणी करताना १७हजार कर्मचाऱ्यांची माहिती जुळली नाही. यात काहींनी नियुक्ती आदेश जोडला नाही, तर काहींनी वैयक्तिक आदेश वाचता येणार नाही असे पाठवले.

राज्यभरातील सुमारे चार लाख शिक्षक-शिक्षकेतर कर्मचाऱ्यांची माहिती ऑनलाइन संकलित केली. त्याची पडताळणी केली जात असून यातील सुमारे चार टक्के शिक्षकांच्या माहितीत ‘एरर’ दाखवत आहे. त्यानुसार कागदपत्रांची विचारणा केली जाणार आहे.
डॉ. श्रीराम पानझडे, सहसंचालक, माध्यमिक शिक्षण