सोलापूर : पुणे विभाग शिक्षक मतदारसंघाच्या निवडणुकीत बोगस मतदार नोंदणी झाल्याचा गंभीर आरोप करण्यात आला आहे. राज्य माध्यमिक व उच्च माध्यमिक सेवानिवृत्त मुख्याध्यापक संघ महामंडळाचे सोलापूर जिल्हाध्यक्ष सुभाष माने यांनी यासंदर्भात जिल्हाधिकारी तथा पुणे विभागाचे सह निवडणूक निर्णय अधिकारी यांच्याकडे अधिकृत तक्रार दाखल केली आहे.
संबंधित शाळांचे मुख्याध्यापक आणि कथित बोगस मतदारांवर चौकशी करून फौजदारी गुन्हे दाखल करावेत, अशी मागणी त्यांनी केली आहे. तक्रारीनुसार, राज्य शाळा कृती समितीचे पदाधिकारी मारुती गायकवाड आणि समाधान घाडगे यांनी उमेदवार दत्तात्रय सावंत यांच्या फायद्यासाठी नियमांचे उल्लंघन करून, शिक्षणाधिकाऱ्यांची वैयक्तिक मान्यता नसलेल्या व्यक्तींची शिक्षक मतदार म्हणून नोंदणी केल्याचा आरोप करण्यात आला आहे.
या प्रकरणाची सखोल चौकशी करण्याची मागणी तक्रारदारांनी केली आहे. बूथ क्रमांक ८८ (तुंगत केंद्र) येथे संध्यावली स्कूल, देगाव येथील २० ते २५ शिक्षकांची अधिकृत मान्यता नसतानाही मतदार म्हणून नोंदणी केली. बूथ क्रमांक ८७ (करकंब केंद्र) येथे रांझणी विद्यामंदिर (रांझणी), एम. जी. गुरुकुल (पेहे) आणि शिवरत्न पब्लिक स्कूल (गादेगाव) या शाळांमधील १० ते १५ शिक्षकांची अनधिकृत नोंदणी, बूथ क्रमांक १०५ (पुळूज केंद्र) येथे दर्लिंग विद्यामंदिर (चळे), रांझणी विद्यामंदिर (रांझणी) आणि एम. जी. गुरुकुल (पेहे) या शाळांमधील ३० ते ३५ कथित बोगस शिक्षकांची नोंदणी करून अनधिकृत मतदानाचा प्रयत्न होत असल्याचा दावा तक्रारीत करण्यात आला आहे. या प्रकरणाची तातडीने चौकशी करून संबंधित शाळांचे मुख्याध्यापक आणि कथित बोगस मतदार म्हणून नोंद झालेल्या व्यक्तींवर फौजदारी गुन्हे दाखल करावेत, अशी मागणी माने यांनी केली आहे.
