सोलापूर ; सोलापूर जिल्ह्यातील साखर कारखान्यांनी लाखो टन उसाचे गाळप करूनही अद्याप उसाचा पहिला हप्ता आणि दर जाहीर न केल्याने ऊस उत्पादक शेतकऱ्यांमध्ये तीव्र नाराजी पसरली आहे. शेतकऱ्यांच्या घामाला योग्य दाम देण्याऐवजी दराचा निर्णय प्रलंबित ठेवून गाळप सुरू ठेवणाऱ्या कारखानदारांविरोधात स्वाभिमानी शेतकरी संघटनेचे नेते तथा माजी खासदार राजू शेट्टी यांनी आक्रमक भूमिका घेतली आहे. ‘उसाचा दर जाहीर करा, अन्यथा सोलापुरात येऊन शेतकऱ्यांसह तीव्र आंदोलन छेडू,’ असा थेट इशारा त्यांनी दिला आहे.
जिल्हाधिकारी कार्तिकेयन यांच्याशी दूरध्वनीवरून संवाद साधताना राजू शेट्टी यांनी साखर कारखानदारांच्या कार्यपद्धतीवर तीव्र संताप व्यक्त केला. या संवादाची माहिती सोशल मीडियावर समोर आली आहे. शेतकऱ्यांच्या उसाचा दर निश्चित न करता लाखो टन उसाचे गाळप करणे म्हणजे शेतकऱ्यांची आर्थिक पिळवणूक करण्यासारखे आहे. स्वतःच्या कष्टाने पिकविलेल्या उसाला किती दर मिळणार, हे जाणून घेण्याचा प्रत्येक शेतकऱ्याला अधिकार आहे. मात्र, कारखानदारांकडून या अधिकाराकडेच दुर्लक्ष केले जात असल्याचा आरोप शेट्टी यांनी केला.
साखर कारखानदारांना गाळपाची एवढीच घाई असेल, तर त्यांनी सर्वप्रथम उसाचा दर जाहीर करावा. जाहीर केलेला दर शेतकऱ्यांना मान्य असेल, तर ते स्वतःहून ऊस गाळपासाठी देतील. मात्र, दराचा निर्णय न घेता शेतकऱ्यांवर दबाव टाकून ऊस घेण्याचा प्रयत्न करणे ही सरळसरळ दादागिरी असल्याचे शेट्टी यांनी स्पष्ट केले. इतर जिल्ह्यांतील साखर कारखानदार उसाला दर देण्याची तयारी दर्शवत असताना सोलापूर जिल्ह्यातील कारखानदार मात्र दर जाहीर करण्याबाबत टाळाटाळ करीत असल्याचा आरोपही त्यांनी केला. एकीकडे शेतकरी उत्पादन खर्च, मजुरी, वाहतूक आणि शेतीवरील वाढत्या खर्चामुळे आर्थिक अडचणीत सापडला आहे. अशा परिस्थितीत उसाच्या पहिल्या हप्त्याबाबत अनिश्चितता कायम राहिल्याने शेतकऱ्यांच्या चिंतेत आणखी भर पडत आहे.
दरम्यान, जिल्हाधिकाऱ्यांच्या उपस्थितीत होणाऱ्या बैठकीकडे ऊस उत्पादक शेतकऱ्यांचे लक्ष लागले आहे. या बैठकीपर्यंत कोणत्याही साखर कारखानदाराने शेतकऱ्यांवर दबाव आणू नये किंवा बळजबरी करू नये, अशी स्पष्ट भूमिका शेट्टी यांनी मांडली आहे. बैठकीत ऊसदराच्या प्रश्नावर समाधानकारक तोडगा न निघाल्यास आंदोलन अधिक तीव्र करण्याचा इशाराही त्यांनी दिला. साखर उद्योगाच्या नावाखाली शेतकऱ्यांची आर्थिक लूट करणारी प्रवृत्ती सहन केली जाणार नाही. जिल्ह्यातील कारखानदारांनी आपली भूमिका तातडीने स्पष्ट करावी. अन्यथा सोलापूर जिल्ह्यात ठाण मांडून महाराष्ट्रातील ऊस उत्पादक शेतकऱ्यांना एकत्र करत व्यापक आंदोलन उभारण्यात येईल, असा इशारा राजू शेट्टी यांनी दिल्याने जिल्ह्यातील साखर उद्योग क्षेत्रात खळबळ उडाली आहे.
‘दर ठरवा, मगच ऊस गाळप करा!’ शेतकऱ्यांच्या उसाला किती दर द्यायचा, हे निश्चित न करताच गाळप सुरू ठेवण्याच्या कारखानदारांच्या भूमिकेवर राजू शेट्टी यांनी जोरदार आक्षेप घेतला आहे. कारखानदारांनी प्रथम उसाचा दर जाहीर करावा आणि त्यानंतरच शेतकऱ्यांच्या संमतीने ऊस गाळपासाठी घ्यावा. शेतकऱ्यांच्या असहायतेचा गैरफायदा घेण्याचा प्रयत्न झाल्यास स्वाभिमानी शेतकरी संघटना रस्त्यावर उतरल्याशिवाय राहणार नाही, असा इशारा त्यांनी दिला.
जिल्हाधिकाऱ्यांच्या बैठकीकडे शेतकऱ्यांचे लक्ष सोलापूर जिल्ह्यातील ऊसदराचा तिढा सोडविण्यासाठी होणारी बैठक महत्त्वपूर्ण ठरणार आहे. पहिल्या हप्त्याची रक्कम, ऊसदराची घोषणा आणि कारखानदारांची भूमिका या मुद्द्यांवर बैठकीत काय निर्णय होतो, याकडे शेतकऱ्यांचे लक्ष लागले आहे. या बैठकीनंतर स्वाभिमानी शेतकरी संघटना पुढील आंदोलनाची दिशा ठरविण्याची शक्यता आहे.
