भाविकांना हा सोहळा घरबसल्या पाहता येणार
पंढरपूर : पंढरपूर येथे माघ शुद्ध १ ते ५ या कालावधीत संपन्न होणाऱ्या श्री विठ्ठल रुक्मिणी मातेच्या विवाह सोहळ्याची जय्यत तयारी श्री विठ्ठल रुक्मिणी मंदिरे समितीच्यावतीने करण्यात आली असून, वसंत पंचमी २३ जानेवारी रोजी परंपरेनुसार विवाह सोहळा संपन्न होणार असल्याची माहिती कार्यकारी अधिकारी राजेंद्र शेळके यांनी दिली.
श्री रूक्मिणी स्वयंवर कथेचे आयोजन १९ ते २२ जानेवारी या कालावधीत दररोज दुपारी ४ ते ६ या वेळेत करण्यात आले आहे. या कथेचे निरूपण प्रख्यात श्रीमद् भागवताचार्य साध्वी अनुराधा (दीदी) राजेंद्र शेटे या करणार आहेत. वसंत पंचमीला सकाळी १० ते १२ या वेळेत श्री विठ्ठल रूक्मिणी मातेचा विवाह सोहळा विधिवत मंत्रोच्चारात संपन्न होणार आहे. पहाटे काकडा आरतीवेळी श्री विठ्ठलास सोन्याच्या मुकुटाऐवजी मंदिरातील पांढरे पागोटे परिधान करण्यात येईल.
या दिवसापासून रंगपंचमीपर्यंत श्री विठ्ठलास पांढरा पोशाख परिधान केला जाणार आहे. नित्यपूजेच्या वेळी श्री विठ्ठल व श्री रूक्मिणी मातेस गुलाल अर्पण करण्यात यईल. वसंत पंचमीच्या दिवशी फक्त याच दिवशी श्री रूक्मिणी मातेस सकाळी पांढरा पोशाख परिधान करण्यात येईल.सकाळी ११ वाजता श्री विठ्ठलाची तुळशी पूजा होईल. त्यानंतर श्री विठ्ठलास विवाह स्थळी येण्याचे निमंत्रण देण्यात येणार आहे. श्री रूक्मिणी मातेस पांढरा पोशाख व पारंपारिक अलंकार परिधान करून पाद्यपूजा, नैवेद्य व आरती केली जाईल. दुपारी १२ वाजता श्री विठ्ठल व श्री रूक्मिणी मातेच्या प्रतीकात्मक मूर्ती श्री विठ्ठल सभामंडपात आणून विवाह सोहळा विधिवत पार पडेल.त्यानंतर दुपारी ४ वाजता पोशाखानंतर पाद्यपूजा होऊन यानंतर श्री विठ्ठल व श्री रूक्मिणी मातेच्या प्रतीकात्मक मूर्तीची सवाद्य शोभायात्रा काढण्यात येणार आहे.
सदर शोभायात्रा व्ही.आय.पी. गेट श्री संत नामदेव पायरी महाद्वार पोलीस चौकी कालिका देवी मंदिर काळा मारुती चौफाळा-नाथ चौक तांबडा मारुती मंदिर-माहेश्वरी धर्मशाळा- महाद्वार पोलीस चौकी पश्चिम द्वार व्ही. आय.पी. गेट या मार्गाने निघणार आहे.भाविकांना सोहळा पाहता यावा, यासाठी चौफाळा व महाद्वार पोलीस चौकी येथे एलईडी स्क्रीन बसविण्यात येणार असून, विविध समाजमाध्यमांद्वारे थेट प्रक्षेपण करण्यात येणार आहे. त्यामुळे भाविकांना हा सोहळा घरबसल्या पाहता येणार आहे. तसेच वसंत पंचमीच्या दिवशी दुपारी १२ ते सायंकाळी ७ वाजेपर्यंत अन्नछत्र सुरू ठेवण्यात येणार असल्याची माहिती मंदिर समितीचे व्यवस्थापक संदेश भोसले यांनी दिली.
