सोलापूर: डिजिटल युगात सायबर गुन्हेगार आता थेट उच्चपदस्थ सरकारी अधिकाऱ्यांच्या नावाचा वापर करून नागरिकांची फसवणूक करण्याचा प्रयत्न करत आहेत. सोलापूरचे माध्यमिक शिक्षणाधिकारी सचिन जगताप यांचे व्हॉट्सअॅप खाते हॅक करून त्यांच्या संपर्कातील शेकडो व्यक्तींना ‘लग्नाच्या आमंत्रणाचे’ बनावट मेसेज पाठवण्यात आल्याचा खळबळजनक प्रकार उघडकीस आला आहे.
शिक्षणाधिकारी जगताप यांच्या मोबाईलवर रविवारी इंग्रजी भाषेत लग्नाचे निमंत्रण असल्याचा एक मेसेज आला होता. ओळखीच्या व्यक्तीकडून निमंत्रण आले असावे, या समजातून त्यांनी मेसेजमधील लिंक किंवा फाईल उघडली. मात्र, ही फाईल एक घातक ‘APK’ (Android Package Kit) फाईल होती. ही फाईल डाऊनलोड होताच सायबर गुन्हेगारांनी त्यांच्या व्हॉट्सअॅपचा ताबा मिळवला आणि त्यांच्या कन्टॅक्ट लिस्टमधील अनेकांना तोच घातक मेसेज आपोआप फॉरवर्ड झाला.
आपले खाते हॅक झाल्याचे लक्षात येताच सचिन जगताप यांनी त्वरित सोलापूर सायबर पोलिसांशी संपर्क साधला. पोलिसांच्या तांत्रिक मार्गदर्शनानुसार त्यांनी संबंधित संशयास्पद अॅप मोबाईलमधून डिलीट केले. या घटनेनंतर जगताप यांनी स्वतः सोशल मीडियाच्या माध्यमातून आवाहन केले आहे की, त्यांच्या नावाचा वापर करून आलेल्या कोणत्याही संशयास्पद फाईलवर क्लिक करू नका.
नागरिकांना आवाहन:
लग्नाचे आमंत्रण, सरकारी योजना किंवा बक्षीस लागल्याचे सांगून येणाऱ्या ‘APK’ फाईल्स डाऊनलोड करणे टाळावे. अशा फाईल्समुळे तुमचा मोबाईल हॅक होऊन तुमची खासगी माहिती आणि बँक खात्यातील पैसे चोरीला जाऊ शकतात, असा इशारा सायबर तज्ज्ञांनी दिला आहे
