सोलापूर ; शहरातील अवैध सावकारीला आळा घालण्यासाठी सहकार विभागाने कठोर पावले उचलत बापूजी नगर परिसरात छापा टाकून एका महिलेविरुद्ध गुन्हा दाखल केला आहे. या कारवाईमुळे खाजगी सावकारीच्या वाढत्या प्रकारांवर प्रशासनाने लक्ष केंद्रीत केल्याचे स्पष्ट झाले आहे. जिल्हा उपनिबंधक किरण गायकवाड व उपनिबंधक डॉ. प्रगती बागल यांच्या मार्गदर्शनाखाली सहकार विभागाच्या पथकाने ही कारवाई केली. पथक प्रमुख राजू नरहरी ढोणे, सहाय्यक सहकारी अधिकारी स्वप्निल वट्टे व के. बी. जमादार यांनी अर्जदार गुरुगंगा बनसोडे यांच्या तक्रारीवरून ९ एप्रिल रोजी बापूजी नगर, स्लॉटर हाऊस परिसरात छापा टाकला.
झडतीदरम्यान श्रीमती लक्ष्मी मौलाली गाडे यांच्या निवासस्थानी अवैध सावकारीशी संबंधित महत्त्वाची कागदपत्रे आढळून आली. तपासात संबंधित महिला कोणतीही वैध परवाना न घेता सावकारी व्यवसाय करत असल्याचे निष्पन्न झाले.या प्रकरणी महाराष्ट्र सावकारी (नियमन) अधिनियम २०१४ अंतर्गत कलम ३९ व ४१ नुसार सदर बझार पोलिस ठाण्यात १० एप्रिल रोजी शासकीय फिर्याद दाखल करण्यात आली आहे. शहरात अवैध सावकारीच्या वाढत्या प्रकरणांमुळे नागरिकांचे आर्थिक शोषण होत असल्याच्या तक्रारी वाढत आहेत. या पार्श्वभूमीवर अशा प्रकारांविरुद्ध कठोर कारवाई सुरूच राहणार असल्याचे जिल्हा उपनिबंधक किरण गायकवाड यांनी सांगितले.
