सोलापूर : गुंठेवारी शिबिरामुळे सोलापूर शहरातील नागरिकांना त्यांच्या हक्काचे प्रॉपर्टी कार्ड मिळणार असून, त्यांच्या मालमत्तेसंबंधित प्रश्न कायमस्वरूपी मार्गी लागतील. तसेच या सर्व प्रक्रियेमुळे सोलापूर महापालिकेच्या उत्पन्नात वाढ होणार आहे. त्यामुळे नागरिकांनी या शिबिराचा मोठ्या प्रमाणात लाभ घ्यावा, असे आवाहन महापौर श्री विनायक कोंड्याल यांनी केले.
सोलापूर महानगरपालिकेच्या वतीने प्रभाग क्र. १२ मधील नागरिकांसाठी आयोजित करण्यात आलेल्या नीलम नगर, एमआयडीसी येथील नेताजी सभागृह येथे गुंठेवारी शिबिरास आज महापौर विनायक कोंड्याल यांनी भेट देऊन पाहणी केली. या विशेष शिबिरामध्ये प्रभागातील नागरिकांच्या मालमत्तेसंदर्भातील विविध प्रलंबित बाबी मार्गी लावण्यासाठी हद्दवाढ, मोजणी तसेच नोटरीद्वारे झालेल्या खरेदी व्यवहारांची नोंदणी (RTSR) करण्याची सुविधा एकाच ठिकाणी उपलब्ध करून देण्यात आली आहे. नागरिकांना वेगवेगळ्या कार्यालयांत हेलपाटे मारावे लागू नये, यासाठी प्रशासनाने सर्व संबंधित विभागांचा समन्वय साधून हे शिबिर आयोजित केले आहे.महापौर विनायक कोंड्याल यांनी शिबिरातील सुविधा, कागदपत्र पडताळणी प्रक्रिया, पाहणी केली व संबंधित अधिकाऱ्यांना त्यांनी कामकाज पारदर्शक, जलद व शिस्तबद्ध पद्धतीने पार पाडण्याच्या सूचना दिल्या. कोणत्याही नागरिकाला अडचण येऊ नये व प्रत्येक अर्जदाराला योग्य मार्गदर्शन मिळावे, यासाठी विशेष दक्षता घेण्याचे निर्देशही त्यांनी दिले.
यावेळी नेताजी सुभाषचंद्र बोस हायस्कूलचे मुख्याध्यापक रविशंकर कुंभार यांच्या हस्ते महापौर विनायक कोंड्याल यांचा सत्कार करण्यात आला. यावेळी नगरसेवक सिद्धेश्वर कमटम यांचाही सत्कार करण्यात आला. यावेळी उपअभियंता नीलकंठ मठपती, सहाय्यक अभियंता आनंद जोशी, सहाय्यक अभियंता शकील शेख, सहायक अभियंता महेश क्षीरसागर, गौरीशंकर आळंगे विश्वराध्य मठपती, राम मगर,शिवा कोळी, व्यंकटेश वाशी, श्रीनिवास बुटा, शुभम जिल्हा,मलू अष्टगे , श्री बुधाराम, इर्शाद जरतार, दिपाली मेटकरी, रेखा चिंतलवार यांची प्रमुख उपस्थिती होती. संबंधित विभागांचे अधिकारी, कर्मचारी व स्थानिक नागरिक मोठ्या संख्येने उपस्थित होते.
