सोलापूर माळशिरस : जिल्हा परिषदेचे मुख्य कार्यकारी अधिकारी कुशल जैन यांनी आज माळशिरस पंचायत समितीला भेट देत तालुक्यात राबविण्यात येत असलेल्या विविध शासकीय योजनांचा सविस्तर आढावा घेतला. या दौऱ्यात त्यांनी विशेषतः ध्वजांकित (फ्लॅगशिप) योजनांच्या प्रगतीची पाहणी करत संबंधित अधिकाऱ्यांना कामे वेळेत आणि गुणवत्तापूर्ण पूर्ण करण्याच्या सूचना दिल्या. यावेळी जिल्हा नियोजन समितीच्या निधीतून उभारण्यात येत असलेल्या सोलार प्रकल्पाची त्यांनी प्रत्यक्ष पाहणी केली. या प्रकल्पामुळे स्थानिक पातळीवर वीज बचत आणि पर्यावरणपूरक ऊर्जा निर्मितीस चालना मिळणार असल्याचे त्यांनी नमूद केले. प्रकल्पाच्या कामाचा वेग वाढवून तो लवकर पूर्ण करण्याचे निर्देश त्यांनी दिले.
त्यानंतर जैन यांनी पुरंदावडे येथील प्राथमिक आरोग्य केंद्राला भेट देऊन तेथील आरोग्य सेवा, उपलब्ध सुविधा आणि मनुष्यबळ यांचा आढावा घेतला. ग्रामीण भागातील नागरिकांना दर्जेदार आरोग्य सेवा मिळणे अत्यंत महत्त्वाचे असून, त्यात कोणतीही कमतरता राहू नये, असे त्यांनी स्पष्ट केले. जलजीवन मिशन अंतर्गत उभारण्यात येणाऱ्या पाण्याच्या टाकीचीही त्यांनी पाहणी केली. या योजनेद्वारे प्रत्येक घरापर्यंत स्वच्छ पाणी पोहोचवण्याचे उद्दिष्ट आहे. संबंधित कामे प्रलंबित न ठेवता नियोजित वेळेत पूर्ण करावीत, अशा सूचना त्यांनी अधिकाऱ्यांना दिल्या.
तसेच तिरवंडी येथील प्राथमिक शाळेला भेट देत त्यांनी शैक्षणिक सुविधा, विद्यार्थ्यांची उपस्थिती आणि शाळेतील पायाभूत सुविधांची तपासणी केली. विद्यार्थ्यांना चांगले शैक्षणिक वातावरण मिळावे यासाठी आवश्यक त्या सुधारणा तातडीने कराव्यात, असे त्यांनी सांगितले. या दौऱ्यावेळी अतिरिक्त मुख्य कार्यकारी अधिकारी संदीप कोहिणकर, माळशिरसचे गटविकास अधिकारी रघुनाथ पांढरे तसेच इतर संबंधित अधिकारी उपस्थित होते. दौऱ्यामुळे तालुक्यातील विविध योजनांच्या अंमलबजावणीला गती मिळण्याची अपेक्षा व्यक्त केली जात आहे.
