सोलापूर : पर्यावरण संवर्धन, इंधन बचत आणि वाढत्या वायू प्रदूषणावर नियंत्रण मिळवण्यासाठी सोलापूर जिल्हा परिषद प्रशासनाने महत्त्वपूर्ण पाऊल उचलले आहे. पंतप्रधान नरेंद्र मोदी यांच्या आवाहनाला प्रतिसाद देत जिल्हा परिषदेमधील सर्व पदाधिकारी, अधिकारी आणि कर्मचाऱ्यांसाठी प्रत्येक सोमवारी ‘नो व्हेईकल डे’ पाळण्याचा निर्णय घेण्यात आला आहे.
१२ मे २०२६ रोजी जारी करण्यात आलेल्या या आवाहनपत्रात पेट्रोल, डिझेल आणि इतर इंधनांचा काटकसरीने वापर करण्याचे आवाहन करण्यात आले आहे. जागतिक तापमानवाढ आणि वाढत्या प्रदूषणाच्या पार्श्वभूमीवर पर्यावरणाचे रक्षण करणे ही प्रत्येकाची सामूहिक जबाबदारी असल्याचे प्रशासनाने नमूद केले आहे.या उपक्रमांतर्गत प्रत्येक सोमवारी अधिकारी व कर्मचाऱ्यांनी खासगी दुचाकी अथवा चारचाकी वाहने कार्यालयात आणू नयेत, असे स्पष्ट करण्यात आले आहे. तसेच शासकीय वाहनांचाही अनावश्यक वापर टाळण्याचे निर्देश देण्यात आले आहेत.
पर्यायी प्रवासासाठी सार्वजनिक वाहतूक व्यवस्था, बस, सायकल, इलेक्ट्रिक वाहन किंवा पायी येण्याला प्राधान्य देण्याचे आवाहन करण्यात आले आहे. या माध्यमातून इंधन बचतीसोबतच पर्यावरण संरक्षणाचा संदेश समाजापर्यंत पोहोचवण्याचा प्रयत्न प्रशासनाने केला आहे.जिल्हा परिषद अध्यक्ष दीपक वैद्य आणि उपाध्यक्ष इंद्रजित पवार यांनी सर्व पदाधिकारी, अधिकारी व कर्मचाऱ्यांनी या विधायक उपक्रमात उत्स्फूर्त सहभाग नोंदवावा, असे आवाहन केले आहे. “चला आपण सर्व मिळून देशहितासाठी छोटेसे योगदान देऊया,” असा संदेशही पत्रकातून देण्यात आला आहे.
