सोलापूर : सोलापूर शहर गुन्हे शाखेने रात्रीच्या वेळी घरफोडी करणाऱ्या आंतरजिल्हा चोरट्यांच्या टोळीचा पर्दाफाश करत चार सराईत आरोपींना जेरबंद केले आहे. या कारवाईत रोख रक्कम, सोन्याचे दागिने आणि गुन्ह्यात वापरलेली कार असा तब्बल साडेचार लाख रुपयांचा मुद्देमाल जप्त करण्यात आला आहे. या टोळीने न्यू बुधवार पेठ परिसरात एकाच रात्री दोन घरफोड्या केल्याचे उघड झाले आहे.
गेल्या ४ मे रोजी रात्री दहा ते ५ मे रोजी सकाळी सात वाजण्याच्या दरम्यान न्यू बुधवार पेठ परिसरातील दोन बंद घरांचे कडी-कोयंडे तोडून चोरट्यांनी घरातील कपाटातील रोख रक्कम आणि एका लहान मुलीच्या कानातील सोन्याच्या बाळ्या असा एकूण ४७ हजार ५०० रुपयांचा ऐवज लंपास केला होता. याप्रकरणी जोडभावी पेठ पोलीस ठाण्यात घरफोडीचे गुन्हे दाखल करण्यात आले होते.
या गुन्ह्यांचा तपास करत असताना गुन्हे शाखेचे पोलीस निरीक्षक अरविंद माने यांच्या मार्गदर्शनाखाली सहाय्यक पोलीस निरीक्षक शैलेश खेडकर आणि त्यांच्या पथकाने तांत्रिक माहितीच्या आधारे आरोपींचा माग काढला. तपासादरम्यान पुणे येथून चार सराईत आरोपींना ताब्यात घेण्यात आले. अटक करण्यात आलेल्या आरोपींमध्ये दीपक बाबासाहेब ढेंगे, दत्ता अर्जुन कदम, आकाश सुभाष ओंबे आणि अशोक लक्ष्मण बेंद्रे यांचा समावेश आहे. पोलिसांनी आरोपींकडून चोरीतील रोख रक्कम, सोन्याचे दागिने, गुन्ह्यात वापरलेली कार आणि इतर साहित्य असा एकूण ४ लाख ५१ हजार रुपयांचा मुद्देमाल हस्तगत केला आहे.
