विधान परिषद निवडणुकीच्या पार्श्वभूमीवर जिल्हा परिषदेत शुकशुकाट; सदस्य- पदाधिकारी प्रचारात व्यस्त
सोलापूर | मिनी मंत्रालय म्हणून ओळखल्या जाणाऱ्या सोलापूर जिल्हा परिषदेत विधान परिषद निवडणुकीच्या आचारसंहितेचा परिणाम स्पष्टपणे दिसून येत असून, संपूर्ण परिसरात शुकशुकाटाचे वातावरण निर्माण झाले आहे. आठवड्याचा पहिला दिवस असलेल्या सोमवारीही जिल्हा परिषदेत नेहमीची वर्दळ दिसून आली नाही.
विधान परिषद निवडणुकीसाठी जिल्हा परिषदेचे ६८ सदस्य मतदार असल्याने विविध उमेदवारांकडून त्यांच्या गाठीभेटी सुरू आहेत. त्यामुळे अनेक सदस्यांनी जिल्हा परिषदेकडे पाठ फिरविल्याचे चित्र आहे. या निवडणुकीत भाजपचे उमेदवार माजी आमदार राजेंद्र राऊत आणि राष्ट्रवादी काँग्रेस (शरद पवार गट) चे जिल्हाध्यक्ष वसंत नाना देशमुख यांच्यात थेट लढत होत असून, दोन्ही उमेदवारांनी मतदार संपर्क मोहीम वेगवान केली आहे. आचारसंहितेमुळे जिल्हा परिषदेत नवीन विकासकामांना मंजुरी देता येत नसल्याने तसेच धोरणात्मक निर्णयांवर निर्बंध आल्याने पदाधिकारीदेखील सक्रिय दिसत नाहीत. परिणामी, जिल्हा परिषदेत सध्या केवळ नियमित प्रशासकीय कामकाज सुरू असून राजकीय हालचाली जवळपास ठप्प झाल्या आहेत.
पदाधिकारी आणि सदस्य निवडणुकीच्या कामात व्यस्त असल्याने कार्यकर्त्यांनीही जिल्हा परिषदेकडे पाठ फिरवली आहे. १८ जून रोजी मतदान आणि त्यानंतर मतमोजणी होणार असल्याने २६ जूननंतरच जिल्हा परिषदेत पुन्हा राजकीय वर्दळ वाढण्याची शक्यता व्यक्त केली जात आहे.
