१० किलोहून अधिक गांजासह फंट्या दोशी जेरबंद; ३ लाखांचा मुद्देमाल जप्त
सोलापूर | अंमली पदार्थांच्या अवैध व्यापाराविरोधात करमाळा पोलिसांनी धडक कारवाई करत सुमारे १० किलो २४८ ग्रॅम गांजा आणि मोटारसायकलसह ३ लाख ६ हजार २०० रुपयांचा मुद्देमाल जप्त केला. या प्रकरणी गौरव उर्फ फंट्या दिलीप दोशी (रा. गुजर गल्ली, करमाळा) याला रंगेहाथ अटक करण्यात आली आहे. पोलीस हवालदार अर्जुन गोसावी यांना मिळालेल्या गोपनीय माहितीनुसार, करमाळा पोलिसांनी सायकर प्लॉटिंग व देवीचा माळ परिसराकडे जाणाऱ्या चौकात मध्यरात्री सापळा रचला. संशयास्पद हालचाली करणाऱ्या फंट्या दोशी याला अडवून पंचांसमक्ष वाहनाची झडती घेण्यात आली.
झडतीदरम्यान त्याच्या मोटारसायकलवरील पांढऱ्या पिशवीत लपवून ठेवलेला २ लाख ५६ हजार २०० रुपये किमतीचा १० किलो २४८ ग्रॅम गांजा आढळून आला. याशिवाय ५० हजार रुपये किमतीची मोटारसायकल जप्त करण्यात आली. अशा प्रकारे एकूण ३ लाख ६ हजार २०० रुपयांचा मुद्देमाल पोलिसांनी ताब्यात घेतला. याप्रकरणी आरोपीविरुद्ध करमाळा पोलीस ठाण्यात एन.डी.पी.एस. कायद्यानुसार गुन्हा दाखल करण्यात आला असून, पुढील तपास पोलीस उपनिरीक्षक संदीप बनकर करीत आहेत. ही कारवाई पोलीस अधीक्षक अतुल कुलकर्णी, अप्पर पोलीस अधीक्षक विजय कबाडे यांच्या मार्गदर्शनाखाली पोलीस निरीक्षक रणजित माने आणि त्यांच्या पथकाने यशस्वीरीत्या पार पाडली.
गोपनीय माहिती ठरली निर्णायक
पोलीस हवालदार अर्जुन गोसावी यांना मिळालेल्या अचूक माहितीच्या आधारे पोलिसांनी मध्यरात्री सापळा रचला आणि संशयिताला अंमली पदार्थांसह रंगेहाथ पकडण्यात यश मिळवले. या कारवाईमुळे करमाळा परिसरातील अंमली पदार्थांच्या अवैध नेटवर्कला मोठा धक्का बसल्याचे मानले जात आहे.
