सोलापूर ; सोलापूर-महामार्गावरील जवळच्या विजयपूर तेरामैल रिलायन्स पेट्रोल पंपाजवळ भरधाव मोटरसायकलवरून सोलापूरच्या दिशेने निघालेले दोघे छोट्या पुलावरून खाली पडून गंभीर जखमी झाले. यामध्ये एकाचा जागीच मृत्यू झाला तर दुसऱ्याचा सोलापूरला उपचारासाठी घेऊन जाताना मृत्यू झाला. हा अपघात आज गुरुवारी दुपारी साडेतीन वाजण्याच्या सुमारास घडला. विजय गोकुळसिंग लंगडेवाले (वय ५२, रा. हुच्चेश्वरनगर, कुमठा नाका, सोलापूर) आणि श्याम सिद्राम भोसले (वय ५७, भीमाई नगर, माशाळ वस्ती, सोलापूर) अशी त्या दोघांची नावे आहेत. मंद्रूप पोलीस ठाण्यात या अपघाताची नोंद झाली. अधिक माहिती अशी, लंगडेवाले व भोसले मोटारसायकल (एमएच १३/ईयू ४०९५) वरून टाकळी येथे बांधकामाचे काम पाहण्यासाठी गेले होते. परत सोलापूरकडे निघाले असताना नांदणी टोलनाका ओलांडून पुढे गेले. वेगावर नियंत्रण नसल्याने मोटरसायकलसह दोघेही रिलायन्स पेट्रोल पंपाच्या अलीकडे असलेल्या छोट्या पुलावरून खाली पडले. यामध्ये दोघांच्याही डोक्याला गंभीर दुखापत झाल्याने ते बेशुद्ध झाले. लंगडेवालेंचा जागीच मृत्यू झाला. भोसलेंचा उपचारासाठी सोलापूरच्या शासकीय रुग्णालयात घेऊन जाताना मृत्यू झाला.
या अपघाताची माहिती मिळतात पोलीस निरीक्षक शंकर पटवारी, संदीप काशीद, पोलीस संदीप काळे व माजिद शेख हे घटनास्थळी गेले. अॅम्बुलन्समधून जखमी भोसले यास उपचारासाठी सोलापूरच्या शासकीय रुग्णालयात पाठवले. लंगडेवाले यांचा मृतदेह मंद्रूपच्या ग्रामीण रुग्णालयात शवविच्छेदनासाठी पाठवला.
