सोलापूर : शहरातील दाराशा रुग्णालयात भरदिवसा सार्वजनिक मालमत्तेची चोरी करण्याचा प्रयत्न उघडकीस आला. रुग्णालयाच्या प्रवेशद्वारावर बसविण्यात आलेले सोलर पॅनल, लोखंडी पोल आणि संबंधित साहित्य घेऊन जात असताना एका संशयिताला नागरिकांच्या सतर्कतेमुळे रंगेहात पकडण्यात आले. त्यानंतर त्याला सदर बझार पोलिसांच्या ताब्यात देण्यात आले.
मिळालेल्या माहितीनुसार, एका गरजू रुग्णाच्या मदतीसाठी मनोज देवकर दाराशा रुग्णालयात गेले असता, प्रवेशद्वाराजवळील सोलर पॅनल व लोखंडी पोल उपसून एक व्यक्ती घेऊन जात असल्याचे त्यांच्या निदर्शनास आले. त्यांनी तत्काळ रुग्णालयातील कर्मचारी, सुरक्षा रक्षक आणि उपस्थितांच्या मदतीने संबंधित व्यक्तीला पकडले. घटनेची माहिती मिळताच उपमहापौर ज्ञानेश्वरी देवकर यांनी दखल घेत संबंधित पोलीस अधिकाऱ्यांशी संपर्क साधून कारवाईच्या सूचना दिल्या. त्यानंतर सदर बझार पोलिसांनी घटनास्थळी धाव घेत पंचनामा करून संशयिताला ताब्यात घेतले.
संबंधित व्यक्तीने यापूर्वी अशा प्रकारचे गुन्हे केले आहेत का, याचा तपास पोलिसांकडून सुरू आहे. दरम्यान, या घटनेनंतर सार्वजनिक ठिकाणांवरील सोलर यंत्रणा व इतर मालमत्तांच्या सुरक्षेचा प्रश्न पुन्हा ऐरणीवर आला असून, रुग्णालय परिसरात अधिक प्रभावी सुरक्षा व्यवस्था आणि सीसीटीव्ही देखरेखीची मागणी नागरिकांकडून होत आहे
