सोलापूर, दि. २ : शिवसेना उद्धव ठाकरे पक्षाचे नेते संजय राऊत यांनी मुंबई येथे १ ऑगस्ट रोजी झालेल्या पत्रकार परिषदेत सोलापूर जिल्ह्याचे पालकमंत्री जयकुमार गोरे यांच्याबाबत कथितरीत्या आक्षेपार्ह व अवमानकारक शब्दांचा वापर केल्याप्रकरणी फौजदार चावडी पोलीस ठाण्यात तक्रार दाखल करण्यात आली आहे.तक्रारदार मनीष शिवाजी केत (वय ४७, व्यवसाय – नगरसेवक, रा. राजेश कोटे नगर, सोलापूर) यांनी दिलेल्या फिर्यादीनुसार , २ ऑगस्ट रोजी मोबाईल व सोशल मीडियावर संबंधित पत्रकार परिषदेचा व्हिडिओ पाहिल्यानंतर ही बाब निदर्शनास आली.
पत्रकार परिषदेदरम्यान संजय राऊत यांनी पालकमंत्री जयकुमार गोरे यांच्याबाबत निवडणुकीच्या संदर्भात बोलताना कथितपणे “येडझवा” असा अपशब्द वापरून त्यांची बदनामी केल्याचा आरोप तक्रारीत करण्यात आला आहे.या प्रकरणी भारतीय न्याय संहिता (BNS) २०२३ मधील कलम ३५६(२) आणि ३५२ अन्वये फौजदार चावडी पोलीस ठाण्यात तक्रार दाखल करण्यात आली असून पुढील तपास पोलीस उपनिरीक्षक पाटोळे करत आहेत.दरम्यान, या तक्रारीनंतर राजकीय वर्तुळात चर्चेला उधाण आले असून, पोलिसांच्या पुढील कारवाईकडे सर्वांचे लक्ष लागले आहे.
