सरवदे हत्याकांड : भाजप नगरसेविका शालन शिंदे यांना उच्च न्यायालयाकडून जामीन

सोलापूर, दि. ६ : मनसे विद्यार्थी सेनेचे तत्कालीन शहराध्यक्ष बाळासाहेब सरवदे यांच्या हत्येप्रकरणातील आरोपी आणि भाजपच्या नगरसेविका शालन शंकर शिंदे यांना मुंबई उच्च न्यायालयाच्या कोल्हापूर खंडपीठाने जामीन मंजूर केला आहे. न्यायमूर्ती मेहरूज पठाण यांनी एक लाख रुपयांच्या जातमुचलक्यावर त्यांची सुटका करण्याचे आदेश दिले.या प्रकरणात सुरुवातीला दाखल करण्यात आलेला जामीन अर्ज जिल्हा व सत्र न्यायालयाने फेटाळला होता. त्यानंतर शालन शिंदे यांनी ॲड. रितेश थोबडे यांच्यामार्फत उच्च न्यायालयात धाव घेत जामिनासाठी अर्ज दाखल केला होता.

सुनावणीदरम्यान बचाव पक्षाने पोलिसांनी तपास पूर्ण करून दोषारोपपत्र न्यायालयात सादर केल्याचे निदर्शनास आणून दिले. तसेच सुरुवातीला अपघाती मृत्यूची नोंद करण्यात आली होती आणि फिर्यादी व प्रत्यक्षदर्शी साक्षीदारांच्या जबाबांमध्ये विसंगती असल्याचा मुद्दाही न्यायालयासमोर मांडण्यात आला. या बाबींचा विचार करून न्यायालयाने शालन शिंदे यांना जामीन मंजूर केला.बाळासाहेब सरवदे हत्येचा गुन्हा २ जानेवारी २०२६ रोजी जेलरोड पोलीस ठाण्यात दाखल झाला होता. महापालिका निवडणुकीच्या पार्श्वभूमीवर उमेदवारी अर्ज मागे घेण्याच्या वादातून हा प्रकार घडल्याचा आरोप फिर्यादीत करण्यात आला आहे. फिर्यादीनुसार, शालन शिंदे व इतर आरोपींनी रेखा सरवदे यांच्यावर उमेदवारी अर्ज मागे घेण्यासाठी दबाव टाकला होता.

त्याच दिवशी सायंकाळी हनुमान मंदिर परिसरात बाळासाहेब सरवदे यांच्यावर धारदार शस्त्रांनी हल्ला करण्यात आला. या घटनेत शालन शिंदे व अन्य आरोपींची नावे गुन्ह्यात नमूद करण्यात आली होती.या प्रकरणात सरकार पक्षातर्फे ॲड. ए. ए. टक्कळकर यांनी, तर आरोपीतर्फे ॲड. रितेश थोबडे यांनी न्यायालयात बाजू मांडली. सुनावणीनंतर उच्च न्यायालयाने शालन शिंदे यांना एक लाख रुपयांच्या जातमुचलक्यावर जामीन मंजूर केला.