विज्ञान प्रदर्शनात ४९० विद्यार्थ्यांनी साकारले मंगळ, चंद्र मोहिमांसह रोबोटिक्सचे जिवंत मॉडेल्स
सोलापूर : नागेश करजगी ऑर्किड स्कूलमध्ये आयोजित भव्य विज्ञान प्रदर्शनात तब्बल ४९० विद्यार्थ्यांनी सहभाग घेत अंतराळ मोहिमा, मंगळ ग्रह व चंद्र मोहीम, भविष्यातील रोबोटिक्स तंत्रज्ञान तसेच स्वयंचलित उपकरणांची एकापेक्षा एक सरस जिवंत मॉडेल्स सादर केली. विद्यार्थ्यांच्या कल्पकतेला आणि संशोधन वृत्तीला मिळालेल्या या व्यासपीठामुळे प्रदर्शनाला उत्स्फूर्त प्रतिसाद मिळाला. प्रदर्शनाचे उद्घाटन प्रमुख पाहुणे डॉ. लक्ष्मण करळे यांच्या हस्ते दीपप्रज्वलनाने झाले. यावेळी तुकाराम चंद्रकांत साळुंखे, क्रांतिवीर शिवराम महिंद्रकर, डॉ. अशोक सोरगावी, संस्थेचे अध्यक्ष डॉ. कुमार करजगी, शाळेचे व्यवस्थापक अक्षय चिडगुंपी आणि मार्गदर्शिका मीना पारखे उपस्थित होते.
यावेळी डॉ. लक्ष्मण करळे यांनी विद्यार्थ्यांनी कृत्रिम बुद्धिमत्तेचा (एआय) योग्य वापर करून आपल्या संशोधन वृत्तीला चालना द्यावी आणि अशा विज्ञान प्रदर्शनांमध्ये सक्रिय सहभाग घ्यावा, असे आवाहन केले. संस्थेचे अध्यक्ष डॉ. कुमार दादा करजगी आणि संस्थेच्या सचिवा वर्षाताई विभुते यांनी विद्यार्थ्यांच्या संशोधनात्मक कल्पना व सादरीकरणाचे कौतुक केले. विद्यार्थ्यांनी अंतराळ संशोधनापासून भविष्यातील रोबोट्सपर्यंत विविध संकल्पनांवर आधारित मॉडेल्स साकारली. त्यांच्या कल्पकता, आत्मविश्वास आणि तंत्रज्ञानाच्या प्रभावी वापराने उपस्थित पालक व मान्यवरांची मने जिंकली.
कार्यक्रमाचे सूत्रसंचालन विद्यार्थिनी सान्वी चव्हाण व संज्ञा मोहिते यांनी केले. प्रदर्शनास शाळेतील शिक्षक, शिक्षकेतर कर्मचारी तसेच मोठ्या संख्येने पालक उपस्थित होते. ‘विज्ञान केवळ पुस्तकात नसून ते आपल्या दैनंदिन जीवनाचा अविभाज्य भाग आहे,’ अशी प्रतिक्रिया पालकांनी व्यक्त केली. प्रदर्शनाच्या यशस्वी आयोजनासाठी शाळेतील शिक्षक व शिक्षकेतर कर्मचाऱ्यांनी विशेष परिश्रम घेतले. विद्यार्थ्यांनी तंत्रज्ञानाच्या मदतीने साकारलेल्या रोबोट्सच्या प्रभावी सादरीकरणाने विज्ञान प्रदर्शनाची सांगता झाली.
