अखेर आकुलवारांची बदली, नगर अभियंता पदाचा ‘चार्ज’ मठपतींकडे!

सोलापूर : सोलापूर महानगरपालिकेच्या नगर अभियंता पदाचा अतिरिक्त पदभार नगररचना विभागाचे कार्यकारी अभियंता नीलकंठ मठपती यांच्याकडे सोपविण्यात आला आहे. प्रभारी नगर अभियंता सारिका आकुलवार यांची बदली झाल्याने नगर अभियंता पदाचा कार्यभार मठपती यांच्याकडे सोपविण्याचे आदेश महापालिका आयुक्त डॉ. सचिन ओम्बासे यांनी काढले आहेत.

नगर अभियंता हे महापालिकेतील विकासकामांच्या तांत्रिक मंजुरीपासून विविध विभागांमधील प्रशासकीय समन्वयापर्यंत महत्त्वाची भूमिका बजावणारे पद आहे. त्यामुळे हे पद कार्यभाराविना राहू नये, यासाठी प्रशासनाने मठपती यांच्याकडे पुढील आदेशापर्यंत अतिरिक्त पदभार सोपविला आहे. आता नगर अभियंता पदाशी संबंधित तांत्रिक व प्रशासकीय कामकाजाची जबाबदारी मठपती यांच्याकडे राहणार आहे.दरम्यान, महापालिकेतील बहुचर्चित नालेसफाई कामातील कथित गैरप्रकाराच्या चौकशी अहवालाच्या पार्श्वभूमीवर आकुलवारांची बदली आणि नगर अभियंता पदाचा बदललेला कार्यभार चर्चेचा विषय ठरला आहे.

नालेसफाई प्रकरणाच्या चौकशी अहवालात सारिका आकुलवार यांच्यासह तब्बल १९ अधिकारी-कर्मचाऱ्यांवर ठपका ठेवण्यात आला आहे.अवाजवी दरांना तांत्रिक मंजुरी, विभागांमधील आवश्यक समन्वयाचा अभाव, लॉगबुक व बिलांच्या तपासणीत त्रुटी तसेच महापालिकेच्या आर्थिक हिताला बाधा पोहोचेल अशा पद्धतीने कामकाज झाल्याचे गंभीर निरीक्षण चौकशी समितीने नोंदविले आहे.

चौकशी अहवालानंतर संबंधित: अधिकारी-कर्मचाऱ्यांना कारणे दाखवा नोटिसा बजावण्याची प्रक्रिया सुरू होणार असून, गंभीर आरोप असलेल्या अधिकाऱ्यांची विभागीय चौकशी करण्याचे संकेत आयुक्तांनी दिले आहेत. त्यामुळे या प्रकरणातील पुढील प्रशासकीय कारवाईकडे महापालिका वर्तुळाचे लक्ष लागले आहे.

अनंत जाधवांच्या मागणीला पार्श्वभूमी : नालेसफाई प्रकरणाचे तक्रारदार भाजपचे नगरसेवक अनंत जाधव यांनी चौकशी पूर्ण होईपर्यंत सारिका आकुलवार यांना नगर अभियंता पदापासून दूर ठेवण्याची मागणी केली होती. चौकशी अहवालात आकुलवार यांच्यावर ठपका ठेवण्यात आल्यानंतर त्यांच्या भूमिकेबाबत चर्चा सुरू होती. त्यातच आता त्यांची बदली झाल्याने आणि नगर अभियंता पदाचा अतिरिक्त कार्यभार मठपतींकडे सोपविण्यात आल्याने या निर्णयाला विशेष महत्त्व प्राप्त झाले आहे.

मठपतींकडे कारभार; पुढील कारवाईकडे लक्ष : मठपती यांच्या नियंत्रणाखाली नगर अभियंता विभागाचे कामकाज सुरू झाल्यानंतर नालेसफाई प्रकरणातील पुढील प्रशासकीय कारवाईलाही वेग येण्याची शक्यता आहे. कारणे दाखवा नोटिसा, संबंधित अधिकाऱ्यांची जबाबदारी निश्चित करणे आणि गंभीर प्रकरणांत विभागीय चौकशी यामुळे हे प्रकरण पुन्हा चर्चेत आले आहे.आकुलवारांची बदली आणि त्यानंतर नगर अभियंता पदाचा अतिरिक्त पदभार मठपतींकडे देण्यात आल्याने महापालिका प्रशासनातील या घडामोडीकडे सोलापूरकरांचे लक्ष लागले आहे.