चिमुकल्यांच्या नजरेवर शासनाची नजर; ३६ महिने दृष्टी तपासणी अभियान

सोलापुर; राज्यातील शालेय विद्यार्थ्यांमधील दृष्टीदोषाचे वेळेत निदान करून गरजू विद्यार्थ्यांना मोफत नंबरचे चष्मे उपलब्ध करून दिले जाणार आहेत. यासाठी शालेय शिक्षण विभाग, ‘रत्ननिधी चॅरिटेबल ट्रस्ट’ आणि ‘वनसाईट एस्सिलार लक्सोटिका फाउंडेशन’ यांच्यात त्रिपक्षीय सामंजस्य करार करण्यात आला आहे. सह्याद्री अतिथीगृह येथे हा सामंजस्य करार पार पडला.

​या करारानुसार पुढील ३६ महिने (तीन वर्षे) राज्यभरात विशेष शिबिरांद्वारे विद्यार्थ्यांची दृष्टी तपासणी केली जाईल. यात दृष्टीदोष आढळणाऱ्या विद्यार्थ्यांना तांत्रिक भागीदार असणाऱ्या वनसाईट एस्सिलार लक्सोटिका फाउंडेशनमार्फत मोफत चष्मे वाटप करण्यात येतील, तर रत्ननिधी चॅरिटेबल ट्रस्ट प्रत्यक्ष प्रकल्प अंमलबजावणीची जबाबदारी सांभाळेल. या उपक्रमात विद्यार्थ्यांच्या तपासणीची माहिती वैज्ञानिक पद्धतीने संकलित केली जाणार असून, वैयक्तिक डेटाच्या गोपनीयतेची पूर्ण खबरदारी घेतली जाईल.

दर तीन महिन्यांनी प्रगती अहवालाद्वारे तपासणी शिबिरे, लाभार्थी संख्या आणि चष्मा वितरणाचा आढावा घेतला जाईल. या करारप्रसंगी शालेय शिक्षण मंत्री दादाजी भुसे आणि विभागाचे प्रधान सचिव रणजितसिंह देओल उपस्थित होते.