संकष्टी चतुर्थीचे औचित्य; ६० किलो रंग-रांगोळीचा वापर, भाविकांसाठी ठरले आकर्षण
सोलापूर : श्रावण महिन्यातील तिसरा सोमवार आणि त्याच दिवशी आलेल्या संकष्टी चतुर्थीचे औचित्य साधून सोलापूरचे ग्रामदैवत श्री सिद्धरामेश्वर मंदिराच्या सभामंडपात कला संगम फाउंडेशनच्या कलाकारांनी रंगीबेरंगी रांगोळीतून भगवान गणेशाची आकर्षक प्रतिकृती साकारली. धार्मिकतेसोबत सामाजिक संदेश देणारी ही कलाकृती दर्शनासाठी आलेल्या भाविकांचे विशेष आकर्षण ठरली.
कला संगम फाउंडेशनच्या सात ते आठ कलाकारांनी रविवारी रात्री उशिरापर्यंत परिश्रम घेत ही भव्य रांगोळी साकारली. गणेशाची मनमोहक प्रतिकृती आणि आकर्षक रंगसंगतीसाठी सुमारे ३० किलो रांगोळी आणि ३० किलो रंग अशा एकूण ६० किलो साहित्याचा वापर करण्यात आला. रांगोळीच्या माध्यमातून ‘शिवशंभूच्या हाती खेळतो मोरया, विश्वाचा रक्षणकर्ता आणि मूषककर्ता, एकदा पाहुया!’ असा सामाजिक संदेशही देण्यात आला.
श्रावणातील तिसऱ्या सोमवारनिमित्त श्री सिद्धरामेश्वरांच्या दर्शनासाठी शहर व जिल्ह्यासह विविध भागांतून मोठ्या संख्येने भाविक मंदिरात दाखल झाले होते. दर्शनानंतर सभामंडपातील गणेश प्रतिकृती पाहण्यासाठी भाविकांची गर्दी झाली. अनेकांनी रांगोळीसोबत सेल्फी आणि छायाचित्रे काढत हा क्षण मोबाईलमध्ये जतन केला. कला संगम फाउंडेशनच्या या कलात्मक उपक्रमाचे भाविकांनी कौतुक केले. ही रांगोळी साकारण्यासाठी अविनाश जिंकेरी, भास्कर नांदल, रूपा कुताटे, राजेंद्र काळे, आरती पिसे, रक्षा रायकर, सुहानी कांबळे यांच्यासह अन्य सदस्यांनी परिश्रम घेतले.
