बनावटदिव्यांग प्रमाणपत्र प्रकरणी डॉक्टरसह दोघांचा जामीन फेटाळला

सोलापूर : येथील सिव्हिल हॉस्पिटलमधील बनावट दिव्यांग प्रमाणपत्र प्रकरणातील आरोपी डॉ. सतीश भाऊराव कनाके आणि विजय बाबासाहेब गर्जे यांचा जामीन अर्ज जिल्हा व सत्र न्यायाधीश उल्का जोशी यांनी फेटाळून लावला. या प्रकरणी डॉ. वैशंपायन स्मृती शासकीय वैद्यकीय महाविद्यालयाचे अधिष्ठाता डॉ. ऋत्विक जयकर यांनी सदर बझार पोलीस ठाण्यात तक्रार दाखल केली होती.

आरोपींनी संगनमत करून बनावट आधार कार्डवर पत्ता बदलून कोणतीही वैद्यकीय तपासणी न करता लाखो रुपयांचे कमिशन घेऊन बनावट प्रमाणपत्र दिल्याचे तपासात उघड झाले आहे. जिल्हा सरकारी वकील डॉ. प्रदीपसिंग राजपूत यांनी जामिनाला तीव्र विरोध दर्शवला. अनेक आरोपींवर गुन्हे दाखल आहेत. गुन्ह्याचे गांभीर्य, आरोपींमधील व्हॉट्सअॅप चॅटिंग, आर्थिक देवाण-घेवाणीचे पुरावे, जप्त केलेले संगणक आणि तपासातील महत्त्वाचे टप्पे त्यांनी न्यायालयाच्या निदर्शनास आणून दिले. जामीन दिल्यास पुरावे नष्ट होण्याची शक्यता लक्षात घेऊन न्यायालयाने दोन्ही आरोपींचे जामीन अर्ज फेटाळले. आरोपींतर्फे अॅड. पी. बी. भिसे, अॅड. शहानवाझ शेख यांनी काम पाहिले