सोलापूर : फळबाग अनुदानाचे काम करून देण्यासाठी २५ हजारांची लाच मागितल्याबद्दल अक्कलकोट तालुका कृषी अधिकारी कार्यालयातील कृषी सहायकाला लाचलुचपत प्रतिबंधक विभागाने गजाआड केले आहे.लक्ष्मीकांत अशोक सवळी (वय ३९) असे अटक केलेल्या कृषी सहायकाचे नाव आहे. तक्रारदाराने त्यांच्या शेतामध्ये फळबाग लागवड करण्यासाठी कृषी सहायक सवळी यांची भेट घेऊन त्यांच्या सल्ल्याने आंबा फळबाग लागवड करण्याचे ठरवले होते.
फळबाग लागवडीस शासनाकडून टप्प्याटप्प्याने अनुदान मिळत असल्याने तक्रारदाराने कृषी सहायक सवळी यांच्या सूचनेनुसार शेतामध्ये महाराष्ट्र खड्डेड् ग्रामीण रोजगार हमी योजनेअंतर्गत जॉब कार्ड धारकांकडून खोदून घेतले.
त्यानंतर सवळी हे सदर खड्ड्यांची मजुरी व त्यापुढील फळबाग लागवडीकरिता रोपे खरेदी लागवड याकरिता मिळणाऱ्या अनुदानाचे काम करून देण्याकरिता २५ हजार रुपयांची लाचेची मागणी करीत असल्याची तक्रार अॅन्टी करप्शन ब्यूरोकडे त्या शेतकऱ्याने दिली. त्या अनुषंगाने १६ ऑक्टोबर २०२५ रोजी तक्रारीची पडताळणी केली असता सवळी यांनी तक्रारदाराकडे २५ हजार रुपयांची लाच मागणी करून त्यापैकी पहिला हप्ता १५ हजार रुपयांची मागणी करून उर्वरित दहा हजार रुपये नंतर देण्यास सांगितले. या प्रकरणी लाच मागितल्याबद्दल सवळी यांना अटक करण्यात आली असून त्यांच्याविरुद्ध अक्कलकोट उत्तर पोलीस ठाण्यात गुन्हा दाखल करण्यात आला आहे.
यांनी केले कारवाई : ही कारवाई लाचलुचपत प्रतिबंधक विभागाचे पोलीस अधीक्षक शिरीष सरदेशपांडे, अपर पोलीस अधीक्षक अजित पाटील यांच्या मार्गदर्शनाखाली पोलीस उपअधीक्षक प्रशांत चौगुले, पोलीस निरीक्षक रवींद्र लांभाते, पोलीस अंमलदार सायबण्णा कोळी, शिरीषकुमार सोनवणे, संतोष नरोटे, गजानन किणगी, राहुल गायकवाड यांनी केली.
